Qazaqstan káristeri birlestigi tóraǵasynyń keńesshisi Georgıı Kan Almatydaǵy "Mádenıet úıinde" jastarǵa arnalǵan qandaı baǵdarlamalar bar ekenin aıtty. Onyń aıtýynsha úıirmelerde eń aldymen memlekettik til qazaq tilin, keıin ár ult ókiline óziniń ana tilin úıretedi. Bul týraly Qoǵamdyq kelisim uıymy jumysynyń 9 aıdaǵy qorytyndysy men prezıdent joldaýyna oraı etnomádenı ortalyqtarǵa qoldaý kórsetý sharalary týraly ótken Almatydaǵy ortalyq komýnıkasıalar qyzmetindegi brıfıń barysynda málim etti.

"Bizdiń bolashaǵymyz – jastar. Jastar bolmasa bizdiń etnomádenı qaýymdastyq ta, basqa mekemeler de bolmaıtyn edi. Kez kelgen mekemeniń jastarǵa arnalǵan baǵdarlamalary men uıymdary bolady. Sol sekildi bizde de assambleıa aıasynda Jastar assambleıasy jumys isteıdi. Bul uıym respýblıka boıynsha jastardyń basyn qosyp, mańyzdy is-sharalar uıymdastyryp otyrady. Uıymdardyń eń basty mindeti – belsendilik. Qazir elimizde óte belsendi ári kreatıvti jastar ósip keledi. Alaıda kóbiniń tájirıbesi joq. Sol sebepti biz jastardyń tájirıbe jınaqtap, belsendiligin qoldaný úshin túrli baǵdarlamalar jasaqtadyq. Jastar óziniń kúsh-qýatyn ózine paıdasyn jolda jumsamasyn degen nıetpen túrli forýmdar uıymdastyralady. Jastar assambleıasy bir ǵana baǵytta emes birneshe baǵyt boıynsha jumys istep keledi. Sondaı-aq atalǵan uıym tek assambleıadaǵy jastarmen ǵana emes jalpy barlyq jas azamattarmen jumys isteıdi. Árıne, ýnıversıtetter men kolejdegi jastarmen jumys isteý áldeqaıda jeńil. Biraq budan basqa da jastar bar emes pe?! Olarmen de birge jumys istep, belsendiligi men tájirıbesin arttyrý úshin jumys isteý kerek. Bul tek bizdiń ǵana emes barlyǵymyzdyń mindetimiz dep bilemin", deıdi tóraǵa.

"Medenıet úıindegi" til úıretý, án jáne bı úıirmeleri memleket tarapynan qarjylandyrylady eken. 

"Til bilý, bı, án aıtý úıirmeleri – memlekettik baǵdarlamalar. Barlyq etnobirlestik qaýymdastyǵy atynan men sizderdi Almatydaǵy «Mádenıet úıine» shaqyramyn. Sol jerde qalaı jumys istep, qandaı sharalar ótkizip jatqandaryńyzdy óz kózińizben kóretin bolasyzdar. Bizdegi úıirmelerde eń aldymen memlekettik til qazaq tili úıretinedi. Sodan soń ár etnos ókiline óz ana tili úıretiledi. Munyń bári zańmen bekitilgen, memleket tarapynan qarjylandyrylyp otyr. Budan bólek án aıtýdy, bıleýdi úıretetin arnaıy úıirmelerimiz de bar. Árbir etnos mádenıetindegi bı men ánniń róli erekshe. Ár ulttyń tilin de, dinin de, ulttyq kıimderin de án men bıden kórinis tabatyny anyq. Sol sebepti bul baǵyt bizdiń eń basty jumystarymyzdyń biri.  Osy baǵyt boıynsha barlyq jaǵdaı jasalyp, qajetti jabdyqtarmen qamtamasyz etilgen", deıdi Georgıı Kan.