Qazaqstan káristeri birlestigi tóraǵasynyń keńesshisi Georgıı Kan Almaty qalasyndaǵy etno mádenı qaýymdastyqtardyń mindetteri men josparlary týraly aıtty. Onyń aıtýynsha, Almatyda 100-den asa ult ókili bar. Bul týraly Qoǵamdyq kelisim uıymy jumysynyń 9 aıdaǵy qorytyndysy men prezıdent joldaýyna oraı etnomádenı ortalyqtarǵa qoldaý kórsetý sharalary týraly ótken Almatydaǵy ortalyq komýnıkasıalar qyzmetindegi brıfıń barysynda málim etti.

"Almaty qalasy kópultty 2 mln adamdy qamtıtyn úlken megopolıs ekenin ózderińiz de jaqsy bilesizder. Qalada 100-den asa ult ókili bar. Qalamyzda 2021 jyly ashylǵan «Dostyq úıi» bar. Bul jerde 35 etno-mádenı qaýymdastyq bar. Bul qaýymdastyqtar men mekemeler tek bir ǵana maqsatta jumys isteıdi. Bizdiń maqsatymyz – ulttardyń birligin qamtamasyz etý", deıdi Qazaqstan kárister birlestigi tóraǵasy. 

Georgıı Kan 2022 jyldyń búkil Qazaqstan halqy úshin aýyr bolǵanyn, alaıda birlikte bul qıyndyqty da eńsergenin aıtty. 

"Qazir bizdiń jumys óte aýqymdy. 2022 jyl biz úshin óte aýyr, kúrdeli jyl boldy. 2022 jylǵy qańtar oqıǵasynan keıin ultaralyq kelispeýshilik oryn almas úshin birlesip jumys istedik. Bul óte aýyr oqıǵa edi. Biraq biz el bolyp, bir bolyp atalǵan qıyndyqty da eńserdik", dedi ol. 

Sondaı-aq ol aldaǵy prezıdent saılaýyna qatysty da pikir bildirip, óz josparlarymen bólisti. 

"Ár jyl saıyn bizge qoıylatyn talap pen tapsyrmalar ózgeretini belgili. Sebebi álemdik jaǵdaılar da, memleketimizde de ózgerister oryn alady. Bıyl merziminen buryn prezıdent saılaýy ótkeli jatyr. Ózderińiz biletindeı, saılaýǵa qatysatyn kandıdattar tizimi de jarıalandy. Biz de osy jumysqa birigip óz úlesimizdi qosýdamyz. Qazaqstannyń prezıdenti Qasym-Jomart Toqaevtyń qatysýymen alda ashyq ári demokratıalyq túrde saılaý ótetin bolady. Qasym-Jomart Kemeluly aıtqan jańa ári ádiletti Qazaqstan qurý úshin halyqtyń senimi mańyzdy. Halyq memlekettik qyzmetkerlerge, polısıa organyna jáne bılikke senim artýy kerek. Biz osy maqsatta jumys istep kelemiz" deıdi Georgıı Kan.