Reseı dýmasyndaǵy bılik partıasy "Edınaıa Rossıa"-dan saılanǵan depýtattar qylmystyq kodekske mobılızasıadan qashqandardy qylmystyq jazaǵa tartý týraly túzetý engizý boıynsha zań jobasyn usyndy, dep jazady Kommersant basylymy.
Depýttattar mobılızasıadan qashqandarǵa 200 myń men 500 myń rúbl arasynda nemese 1-3 jyldaǵy tabysy kóleminde aıyppul salý, kúshtep eńbekke tartý nemese bes jylǵa deıin bas bostandyǵynan aıyrýdy usynyp otyr.
Memlekettik dýmadaǵy qaýipsizdik jáne jemqorlyqpen kúres jónindegi komıtet tóraǵasynyń orynbasary Ernest Valeev zań jobasy parlament qaraýyna usynýǵa ázir ekenin jetkizdi.
Reseıde 21 qyrkúıekte ishinara mobılızasıa jarıalanǵan. Eldiń Qorǵanys mınıstrligi Ýkraınadaǵy soǵysqa jumyldyrylý úshin 300 myń adam áskerge shaqyrylǵanyn habarlady.
28 qazanda Qorǵanys mınıstri Sergeı Shoıgý prezıdent Vladımır Pýtınge ishinara mobılızasıa aıaqtalǵanyn habarlaǵan. 30 qazanda Pýtın mobılızasıany toqtatý týraly jarlyqqa qol qoıýy múmkin ekenin aıtty. Alaıda ázirge naqty qujat joq. Al 31 qazanda mınıstrlik zapastaǵy áskerılerdi shaqyrý toqtatylǵanyn jarıalady.
Pikir qaldyrý