Ońtústik Koreıa polısıasynyń basshysy Iýn Hı Gyn Ithevon aýdanyndaǵy tar kóshede syǵylyp mert bolǵan Helloýın qatysýshylarynyń qazasy úshin zor jaýapkershilikti sezinetinin málim etti, dep jazady Reuters agenttigi.

Ol televıdenıe arqyly tikeleı efırden kórsetilgen brıfıń barysynda polısıa oqıǵa bolǵan jerdigi adam nópirin baqylaýdy durys júrgizbegenin jetkizdi.

"Bolǵan oqıǵaǵa baılanysty úlken jaýapkershilikti sezinemin" dedi Iýn Hı Gyn.

Polısıanyń durys nusqaýlyq kórsetpeýi adamdar syǵylyp, birin-biri taptaǵan oqıǵanyń yqtımaldy sebepteriniń biri retinde qarastyrylyp otyr. Polıseılerdiń durys jón siltemegenin kórgen kýágerler de shyqqan. Kýágerlerlerdiń sózinshe, adamdar polıseılerdiń komandasynan shatasyp ketken.

Sońǵy málimetken saı, oqıǵa qurbandarynyń sany 156-ǵa jetken. 41 adam aýrýhanada jatyr. Qaza tapqandar arasynda 1996 jyly týǵan qazaqstandyq stýdent qyz da bolǵan. Ol Seýl ýnıversıtetiniń magıstratýrasynda oqyp júrgen.