Jambyl oblysy Merki aýdanyndaǵy Qarasý aýylynda poıyz ben jeńil kólik soqtyǵysyp, alty adam mert bolǵan. Bul jóninde Jambyl oblysy polısıa departamentiniń baspasóz qyzmeti habarlady.

Polısıa departamentiniń dereginshe, jol apaty saǵat 8.55 shamasynda bolǵan.

"Túrksib stansıasyndaǵy jelilik polısıa bóliminen Merki aýdanynyń Qarasý aýylynda temirjol ótkelinde jolaýshylar poıyzy Audi avtokóligimen soqtyǵysqany týraly habarlama kelip tústi. Kólik apatynyń saldarynan 6 adam qaza tapty", - dedi Jambyl oblysy PD baspasóz qyzmetiniń jetekshisi Gúlsara Muhtarqulova.

Osy derekke qatysty QR Qylmystyq kodeksiniń 345-baby 4-bóligi boıynsha sotqa deıingi tergeý amaldary bastaldy. Qajetti saraptamalar taǵaıyndaldy.

"Qazaqstan temir joly" kompanıasynyń baspasóz qyzmeti jeńil kólik temirjol ótkeline tańerteńgi saǵat 8:35-te shyqqanyn jarıalady. Kólikte alty adam bolǵan. Qazirgi málimetterge qaraǵanda, jeńil kólik tyıym belgisine qaramastan ótkelge shyǵyp ketken.