Jýrnalıs qazaq tiline bet bura bastaǵandardyń biri Almatydaǵy Voznesensk federaldyq shirkeýiniń ákeıi 36 jastaǵy Iakov Voronstovpen tildesken.
Iakov Voronstov mektep pen joǵary oqý ornynda qazaq tilin oqyǵanymen, kúndelikti ómirde qajeti bolmaıdy dep oılaǵanyn, alaıda Reseı Ýkraınaǵa basyp kirgen 24 aqpan bárin ózgertkenin aıtady.
– 24 aqpan qatty soqqy boldy. Ulty orys, orys ádebıetin jaqsy bilip, orys fılasofıasynan tórt jyl semınar júrgizgen adam retinde fılosofıalyq mıfter men ımperıalyq fantazıanyń qaýpin sezinetinmin. Qubyjyq orys dúnıetanymynyń tereń qatparynda buǵyp jatypty. Endi ol formaǵa ıe boldy. Men budan ózim men otanym Qazaqstan úshin qaýipti kórip turmyn, – degen ol shovınızm men mılıtarızm sıpaty bar orys ádebıetinen bas tartýǵa sheshim qabyldap, qazaqsha úırenýdi qolǵa alǵanyn jetkizgen.
Qazirgi ýaqytta Iakov ákeı Facebook paraqshasynda bıblıa úzindilerin, ondaǵy óleńderdi qazaqsha jarıalap, óz betinshe qazaq tilin úırenip júr.
Jýrnalıs Ýkraınada soǵys bastalǵaly qazaq tilin úırenýshiler sany artqanyn dáıekteý úshin qazaq tili men mádenıetin damytý, tanymal etýdi kózdeıtin Instagram jelisinde Qazaq Grammar degen atpen qurylǵan paraqsha soǵys bastalǵaly jańa 5 myń jazylýshymen tolyqqanyn atap ótken.
Budan bólek Ýkraınadaǵy soǵysty aıyptap beıneúndeý joldaǵan Aqmola oblysynda týǵan etnıkalyq orys Alekseı Skalozýbovtyń keısin keltiredi.
Alekseı beıneúndeýde otany Qazaqstan ekenin, Reseı basqynshylyǵyn aıyptaıtynyn aıtyp, Qazaqstandaǵy ózge orystardy da ustanymyn bildirýge shaqyrady. Artynsha Almatyǵa kóship kelip, qazaqsha úırený úshin qazaqsha sóıleıtinder ortasyn qurý nıetimen arnaıy klýb qurǵan. Búginde klýbqa 300-deı adam múshe atanyp, "Batyl bol" degen atpen jumys istep jatyr. Oǵan qazaqsha bilmeıtin túrli ult ókilderi keledi. Arasynda qazaqsha bilmeıtin qazaqtar da az emes.
Alekseı Skalozýbov klýbqa qosylýshy jańa múshelerdiń basym kópshiligi búginde reseılikterdi qurap otyrǵanyn jetkizdi. Olardyń biri Daǵystannan kelgen Asqar esimdi jigit. Ol ózi úshin turatyn eldiń tilin bilý mańyzdy ekenin, qazaqsha kemi amandasyp, adamdarmen sóılese alatyndaı deńgeıde úırengisi keletinnin aıtady.
