Burynǵy Densaýlyq saqtaý mınıstri Eljan Birtanovtyń advokattary Astana qalasy №2 Saryarqa sotynyń úkimine apelásıalyq shaǵym túsirdi, dep habarlady Ulysmedia.kz. saıty.

Advokat Dmıtrıı Kýráchenkonyń sózinshe, úkimge narazylyq bildirý merzimi 12 qarashada aıaqtalady. Búgingi kúni Kýráchenko men advokat Serik Saǵalıev aldyn ala apelásıalyq shaǵym túsirgen. Qalǵan qorǵaýshylar da joǵary turǵan ınstansıaǵa – Astana qalalyq sotyna júginý úshin shaǵym daıyndaýda.

Kýráchenkonyń aıtýynsha, eks-mınıstrdiń qorǵaýshylary sot úkiminiń ony laýazymdyq ókilettikterin teris paıdalanǵany úshin kináli dep tapqan bóligine narazy.

28 qazanda sot Birtanovty 5 jylǵa, al onyń orynbasary Oljas Ábishevti 4 jylǵa bas bostandyǵyn shekteý týraly úkim shyǵarǵan. Eljan Birtanov “sanavıasıany zańsyz paıdalandy” degen aıyp boıynsha aqtalǵanymen "laýazymyn asyra paıdalandy" degen bap boıynsha aıypty dep tanyldy. Ekeýi sot úkimi boıynsha "keltirilgen" 1 mlrd 350 mln teńge shyǵyndy óteýge mindetteldi.