Búgin belgili satırık, jýrnalıs Kópen Ámirbek qaıtys boldy. Buǵan deıin satırık Astanadaǵy kópsalaly onkologıa aýrýlaryn emdeıtin ortalyqta hırýrgıalyq ota jasatqany, qosymsha em alyp jatqany habarlanǵan. Emine 17 mıllıon teńge qarjat kerektigi týraly da aqparat taraǵan.

Kópen Ámirbek 1950 jyly 29 naýryzda Túrkistan oblysy Otyrar aýdany Eshkiqora aýylynda dúnıege kelgen.

1975 jyldan beri shyǵarmashylyqpen aınalysyp keledi. "Qazaq ádebıeti", "Egemen Qazaqstan" gazetterinde satıra, feleton bóliminiń meńgerýshisi, "Bilim jáne eńbek", "Ara - Shmel" jýrnalynda jaýapty hatshy, Respýblıkanyń Bas prokýratýrasy men Joǵarǵy Sotta baspasóz hatshysy bolyp uzaq jyldar boıy qyzmet istegen.

Ol – "Ara" jýrnalynyń bas redaktory, Qazaq radıosy dırektorynyń orynbasary bolǵan. Qazaqstan Jazýshylar odaǵy basqarmasy satıra keńesiniń tóraǵasy, Máskeý  men Tashkentte ótken Búkilodaqtyq jas satırıkter konkýrsynyń laýreaty.

Ár jyldary jaryq kórgen "Aty joq kitap", "Alyp", "Tilim qyshyp barady", "Qysyr áńgime", "Aýyzbastyryq", "Myń bir mysal", "Nemeneńe jetisip kúlesiń?", "Ózińdi tanısyń ba?", "Saıdaǵy qoıshydan saraıdaǵy patshaǵa deıin" atty ázil-syqaq, parodıa kitaptary arqyly oqyrmandarǵa keńinen tanylǵan. "Tamasha" oıyn-saýyq otaýynyń belsendi avtory bolǵan. Ózi qurǵan "Kópen kele jatyr!.." ázil-syqaq, parodıa teatrymen de kórermenderdiń kózaıymyna aınalǵan.