Eks-prezıdent Nursultan Nazarbaev Túrkıanyń Antalá qalasyndaǵy "Rixos" qonaqúıin QR prezıdenti is basqarmasynyń menshigine ótkizdi, dep habarlady Forbes.kz basylymy. 

Basylym málimetishe, naýryz aıynyń aıaǵynda Úkimet janynan Ekonomıkany monopolıasyzdandyrý jónindegi komısıa qurylǵannan bastap belgili bir aktıvterdiń memlekettik menshikke, negizinen syıǵa tartý sharty nysanynda aýysqany týraly aqparat anda-sanda jarıalanyp keledi. Úkimet mundaı "syılyqtardy" qabyldaýdy tıisti qaýlymen bekitedi.

Bıyl memleketke qaıtarylǵan múlikter jóninde resmı aqparat jarıalanbady. Mysaly, Nursultan Nazarbaev ta qymbat múlikti qaıtarýǵa májbúr bolǵanyn kóbi bile bermeıdi. Bul – Nursultan Nazarbaevqa tıesili Túrkıanyń Antalá qalasynda ornalasqan Rixos Beldibi qonaqúıi. Atalǵan múlik Qazaqstanda  "Alataý qonaqúıi" AQ retinde tirkelgen.

2021 jylǵy 31 jeltoqsandaǵy jaǵdaı boıynsha aýdıttelgen qarjylyq esepke sáıkes, qonaqúıdiń 23%-dan sál astamyna Memlekettik múlik jáne jekeshelendirý komıteti, 77%-yna "Jyljymaıtyn múlikti basqarý dıreksıasy" JSHS ıelik etken. Sońǵysy jeke "Elbasy qoryna" tıesili. Al qor Nazarbaevtiki. 

Úkimettiń 2022 jylǵy 15 aqpandaǵy №62 qaýlysyna, QBP grıfimen (qyzmettik paıdalaný úshin), sondaı-aq 1 naýryzdaǵy qabyldaý-tapsyrý aktisine sáıkes, ekonomıkany monopolıasyzdandyrý jónindegi komısıa qurylǵanǵa deıin de memlekettik múlik jáne jekeshelendirý komıteti "Alataý" qonaq úıi" AQ memlekettik aksıalar paketin ıelený jáne paıdalaný quqyǵyn QR Prezıdenti İs Basqarmasyna bergen. 16 aqpanda "Jyljymaıtyn múlikti basqarý dıreksıasy" JSHS kompanıa aksıonerleriniń quramynan shyqqqan. Bul rette qonaqúıdiń aýdıttelgen qarjylyq esebinde Qazaqstan eks-prezıdentiniń úlesin aýystyrý ádisine qatysty qosymsha túsiniktemeler joq. Bul satyp alý-satý mámilesi me, álde syılyq sharty ma, belgisiz bolyp qala bermek.

Qazir qonaqúı tolyǵymen QR prezıdenti is basqarmasynyń ıeligine ótti.