Búgin Qonaev qalalyq aýrýhanasynyń aýmaǵynda medısına qyzmetkerlerine 35 jańa avtokóliktiń kiltin tapsyrý rásimi ótti.

İs-sharaǵa Almaty oblysynyń ákimi Marat Sultanǵazıev qatysty. Quttyqtaý sózinde ol óńirde medısına salasyna kóp kóńil bólinetinin atap ótti.

– Ýaqtyly shuǵyl kómek kórsetý úshin biz brıgadalardy kóbeıtip, sanıtarlyq kólikti jańartyp jatyrmyz. Oblys úshin lızıń boıynsha 35 mashına bólindi, onyń 7-eýi Qonaev qalasyna tıesili. Meniń oıymsha, endigide jumys isteý jaǵdaıy birshama jeńildeıdi, óıtkeni jańa «jedel járdem» kóligi zamanaýı tehnıkamen jabdyqtalǵan. Jumystaryńyzǵa sáttilik tileımiz, - dedi Marat Sultanǵazıev.

Aıta keteıik, jergilikti búdjet esebinen Hyundai H-350 jáne JAC Sunray markaly sanıtarlyq kóliktiń 35 birligi satyp alyndy.

Almaty oblysy Densaýlyq saqtaý basqarmasynyń basshysy Ómirzaq Nıazbekovtiń aıtýynsha, barlyq avtokólikter qajetti jabdyqtarmen jabdyqtalǵan, bul sapaly jáne shuǵyl kómek kórsetýge múmkindik beredi.

– Jedel jáne shuǵyl medısınalyq kómekti 142 brıgada kórsetedi. Sanıtarlyq avtokólik parkin tolyqtyrý esebinen jedel jáne shuǵyl medısınalyq kómek brıgadalarynyń sanyn 8-ge ulǵaıtý jáne aýyldyq eldi mekenderdiń medısınalyq uıymdarynan qashyqtyqty eskere otyryp, olardyń sanyn 150-ge deıin jetkizý josparlanýda, bul avtoparkti jańartýǵa jáne tolyqtyrýǵa múmkindik beredi. Munyń bári oblys halqy úshin jedel jáne shuǵyl medısınalyq kómekti 100% ýaqytyly kórsetýge múmkindik beredi, -dedi Ómirzaq Nıazbekov.

Esterińizge sala keteıik, «jedel járdemniń» barlyq 35 kóligi Jambyl, Balqash, Kegen, Raıymbek, Uıǵyr, Talǵar, Qarasaı aýdandarynyń, sondaı-aq Boraldaı men Qonaev qalalarynyń shaqyrýlaryna qyzmet kórsetý úshin dıslokasıalar boıynsha bólinedi.