Bas prokýratýra 20 qarashada zańsyz mıtıńilerdi ótkizýge, qatysýǵa jáne ózge de quqyqqa qaıshy áreketter jasaýǵa baılanysty taraǵan aqparattarǵa qatysty úndeý jasady. Vedomstvo málimetinshe, áleýmettik jelilerde sot tyıym salǵan uıymnyń 20 qarashada zańsyz mıtıńilerdi ótkizýge, qatysýǵa jáne ózge de quqyqqa qaıshy áreketter jasaýǵa shaqyrýlary tarap jatyr.

"Ulttyq jáne halyqaralyq quqyqqa sáıkes, terorızmdi nemese zorlyq-zombylyq ekstremızmdi nasıhattaıtyn osyndaı uıymdardyń kez kelgen qyzmetine tyıym salynǵanyn atap ótemin. "Qazaqstan Respýblıkasynda beıbit jınalystar, mıtıńiler, sherýler, pıketter men demonstrasıalar uıymdastyrý jáne ótkizý tártibi týraly" Zańmen (5-baptyń 6-tarmaǵy, 14-baptyń 1-tarmaǵynyń 2-tarmaqshasy) olardyń osyndaı aksıalardy uıymdastyrýyna jol bermeý bekitilgen. Eger aksıalar memlekettiń qaýipsizdigine nuqsan keltirýge, basqa da qylmystyq áreketter jasaýǵa baǵyttalǵan bolsa, olardy júrgizýge de jol berilmeıdi (Zańnyń 14-babynyń 1-tarmaǵynyń 1-tarmaqshasy)", - deıdi bas prokýrordyń orynbasary Jandos Ómirálıev.

Bul zańsyz áreketterdi jasaýmen ushtasqan tyıym salynǵan uıymdardyń shaqyrýlary, uıymdastyrýy jáne olarmen uıymdastyrylǵan aksıalarǵa qatysqany úshin ákimshilik (ÁQBtK-niń 488-baby) jáne qylmystyq jaýaptylyq (QK-niń 179-baby (bılikti kúshtep basyp alýǵa shaqyrý) 405-baby (sot tyıym salǵan uıymdardyń qyzmetine qatysý)) kózdelgen.

Eske salaıyq, buǵan deıin UQK saılaý kúni jappaı tártipsizdik uıymdastyrǵysy kelgen qylmystyq top ustalǵanyn habarlaǵan bolatyn.