17 qarashada "Qazaqmys" korporasıasynyń ken ornynda er adamnyń máıiti tabyldy. 40 jastaǵy er adamdy pyshaqtap óltirgen.
Máıit "Qazaqmys" korporasıasyna qarasty "Jomart" kenishinen tabyldy. Óskemendik shahter atalǵan kenishke is-saparmen jiberilgen.
"Qaıtys bolǵan adam "Qazaqmys" jumyskeri emes. Óskemen qalasynyń merdiger kompanıasynyń jumyskeri. Oqıǵa shahtanyń astynda emes, jer betinde bolǵan" deıdi "Qazaqmys Holdıń" JSHS qoǵamdyq baılanys jáne komýnıkasıalar departamenti baspasóz qyzmetiniń jetekshisi Darhan Muhan.
Atalǵan jaıtqa baılanysty QR QK 99-babynyń 1-bóligi (Kisi óltirý) boıynsha tergeý bastalǵan. Polısıa qyzmetkerleri jedel-izdestirý is-sharalary júrgizilip jatqanyn habarlady.
"17 qarashada kenish aýmaǵynan zorlyq-zombylyq belgisi bar 40 jastaǵy er adamnyń máıiti tabyldy. Qazir polıseıler kúdiktilerdi izdestirý ústinde. Oqıǵanyń mán-jaıy anyqtalyp jatyr" dep habarlady Ulytaý oblysy PD baspasóz qyzmetkerleri.
Pikir qaldyrý