Qazaqstanda ınflásıanyń tómendeýine áser eterlikteı ázirge eshqandaı alǵysharttar joq. Sondyqtan boljam boıynsha jyl sońyna deıin elde ınflásıa deńgeıi 20-21%-ǵa jetýi, tipti odan asýy múmkin. Bul týraly Astanada "Ekonomıka týraly sóılesý: Qazaqstan jańa bolmys aıasynda" taqyrybynda ótken kezdesý barysynda shara uıymdastyrýshy Jusan Analytics zertteý ortalyǵynyń basqarýshy dırektory Ánýar Qýandyqov málimdedi.

Onyń aıtýynsha, otandyq ekonomıkada jaqyn ýaqytta anaý aıtqandaı ózgerister bolmaıdy. Boljam boıynsha Qazaqstanda ekonomıkalyq ósim báseńdeýin jalǵastyryp, jyl sońyna qaraı 2,5%-dy quraýy múmkin. Onyń ústine otandyq Jalpy ishki ónimniń (JİÓ) 60%-dan astamyn quraıtyn aýyl sharýashylyǵy, baılanys, ónerkásip, qurylys, saýda, kólik jáne qoımalaý sekildi 6 iri salanyń tórteýinde ósim tómendep jatyr.

«Biz 80 eldiń ekonomıkasyna taldaý júrgizdik. Olar álemdik JİÓ-niń 80-90%-yn quraıdy. Sol 80 eldiń 60-ynda ınflásıa maqsatty mejeden 2 ese joǵary bolsa, 28 elde 4 ese joǵary. Al bizdiń elde 3 esege artyq», - dedi Á. Qýandyqov.

Álemdik ekonomıkanyń ósimi de báseńdep jatyr. Halyqaralyq valúta qory men basqa da halyqaralyq sarapshylardyń boljamynsha, bıyl ósim ótken jylǵydan tómen bolmaq.  

«Qazir álemdik ekonomıkanyń ósimi 3,2%-dy quraıdy. Jyl basyndaǵy kórsetkish – 4,4%. Boljam boıynsha aldaǵy jyly ósim 2,7%-ǵa deıin tómendeıdi. Odan da tómen bolýy múmkin. Óıtkeni qazir qymbatshylyqqa, yqtımal daǵdarysqa qatysty álemde ortaq mámile, ortaq kelisim joqtyń qasy» dedi Jusan Analytics jetekshisi.