Almaty oblysynyń ortalyǵy Qonaev qalasynda «Konaev CUP - 2022» birinshi halyqaralyq shahmat týrınıri máresine jetti. Atalǵan saıysta Ózbekstan, Tájikstan, Ýkraına, Grýzıa, Qyrǵyzstan, Ázerbaıjan, Armenıa jáne Qazaqstannan 300-den astam oıynshy baq synady. 

Sporttyq jarystyń saltanatty ashylý rásimine oblys ákimi Marat Sultanǵazıev qatysty.

«Qonaev qalasy sporttyq oıyndardyń ortalyǵyna aınaldy. Buqaralyq sportty damytý-memleketimizdiń strategıalyq damý josparynyń basym baǵyttarynyń biri. Bolashaqta osyndaı iri sporttyq is-shara joǵary sanatty sportshylardy daıarlaý men tárbıeleýge yqpal etedi dep oılaımyn» dedi oblys ákimi Marat Sultanǵazıev óziniń quttyqtaý sózinde.

Sondaı-aq is-sharada Qazaqstandy álemdik arenada tanytqan grosmeısterler sóz sóıledi. Olardyń ishinde: Almaty oblysy shahmat jáne doıby federasıasynyń prezıdenti Saıat Egenberdıev, áıelder arasyndaǵy halyqaralyq grosmeıster, Azıa vıse-chempıony, jyldam shahmattan Azıa oıyndarynyń jeńimpazy Dınara Sádýaqasova, shahmattan QR qurama komandasynyń kapıtany, QR jáne Azıanyń birneshe dúrkin chempıony, halyqaralyq dárejedegi grosmeıster Rınat Jumabaev, birneshe dúrkin chempıon QR, 18 jasqa deıingi jastar arasynda álem chempıony, halyqaralyq dárejedegi sport sheberi Qazybek Nógerbek. Bas tóreshiler shahmattan QR eńbek sińirgen jattyqtyrýshysy Alma Ashırova boldy.

Oblystyq shahmat jáne doıby federasıasynyń prezıdenti Saıat Egenberdıev atap ótkendeı, mundaı shara óńirde alǵash ret bastaý alǵan jaıy bar.

«Oblys ákimi Qapshaǵaı sý qoımasynyń jaǵasynda "shahmat úıin" salý ıdeıasyn qoldady. Munda coworking-ortalyq, ozyq IT-tehnologıalarmen jabdyqtalǵan kabınetter, oıyn alańdary bolady dep josparlap otyrmyz. Munda oblystyń eń myqty jattyqtyrýshylary shahmattan sabaq beredi» dedi Saıat Egenberdıev.


«Men bul qalada alǵash ret keldim jáne alǵashqy áserler erekshe. Oblys basshylyǵynyń osyndaı qoldaýyn eskere otyryp, meniń oıymsha, shahmat isi qarqyndy damıtyn bolady. Jańa oblys ortalyǵy sporttyq is-sharalardyń ortalyǵyna aınaldy. Men jazda «Oceanman Kapchagay» jarysyna qatysýǵa daıyndaldym, biraq kestege baılanysty nátıje bermedi. Kelesi jylǵa mindetti túrde qatysýdy josparlap otyrmyn jáne jattyqtyrýshymen birge daıyndalamyn», dedi Dınara Sádýaqasova jýrnalıserge.

Sodan keıin kúni boıy Shveısarıa júıesi boıynsha sportshylar arasynda oıyndar ótti, shahmatshylar 9 kezeńnen ótýi kerek edi. Jalpy júlde qory 4 mln teńgeni qurady. 9 kezeńniń qorytyndysy boıynsha týrnırdiń bas Kýbogynyń jáne 500 myń teńgege aqshalaı sertıfıkattyń ıegeri ázirbaıjandyq shahmatshy Arkadıı Naıdıch atandy.

«Biz túrli halyqaralyq týrnırlerge qatystyq. Olardy salystyra otyryp, men týrnırdi joǵary deńgeıde ótkizgen uıymdastyrýshylarǵa alǵysymdy bildirgim keledi. Biz oıynnan basqa eshteńege alańdamadyq jáne bul osyndaı is-sharany ótkizýge atsalysqan barlyǵynyń eńbegi. Týrnır jyl saıyn ótedi dep úmittenemin jáne osy tamasha týrnır týraly estigennen keıin shahmatshylar kóbirek qatysady», dep atap ótti týrnır jeńimpazy.

Aıta keteıik, Halyqaralyq týrnırdi ótkizý kelesi jylǵa arnalǵan is-sharalar kúntizbesine engeni belgili boldy. Al oblys basshylyǵy Qapshaǵaı sý qoımasynyń jaǵasynda shahmatshylar aleıasyn salýdy josparlap otyr.