Reseıdegi komýnıstik partıa fraksıasy baspasóz qyzmetiniń basshysy Aleksandr Iýshenko Qyrǵyzstannyń el astanasy Bishkektegi keńes ataýlarymen atalyp kele jatqan aýdandardyń atyn aýystyrý týraly sheshimin "keńes kezeńine túkirý" dep atady. Bul týraly ol reseılik Gazetoı.Ru basylymyna aıtqan.

Ol qyrǵyz bıliginiń bastamasyna teris qaraıtynyn, Qyrǵyzstan Keńes odaǵy quramynda bolǵan Baltyq elderi, Ýkraına sekildi jolǵa túsip bara jatyr dep sanaıtynyn jetkizgen.

"Áńgime Qyrǵyzstan Keńes odaǵy tusynda ekonomıkasy myqty el bolyp qalyptasyp, sonyń arqasynda derbes memleket atanǵanynda. Onyń bar potensıaly keńes kezeńinde qalyptasty. Sondyqtan keńes kezeńine túkirý – alysty kóre almaý, qorlaý. Osynyń bárin jasaǵan aǵa býyndy syılamaý" degen ol mundaı isterdiń artynda AQSH pen ujymdasqan batys elderi tur degen pikirde.

"Rýsofobıa men antıkeńestik ustanym Reseıge qarsy áreketpen qatar júrip keledi. Buny AQSH pen ujymdyq batys elderi burynǵy keńes elderiniń aýmaǵyna engizip otyr. Endigi synaq orny retindegi kezek Qyrǵyzstanǵa kelgen sıaqty. Odan keıin áreket Qazaqstanda jalǵasýy ǵajap emes. El bıligi keleshekti boljap, Ýkraına sıaqty synaq elge aınalmas úshin jaǵdaıdy birneshe qadamǵa kóre ala ma, bul – óz aldyna bólek áńgime" deıdi Iýshenko.

Buǵan deıin qyrǵyz parlamentiniń spıkeri Nurlan Shakıev jalpyhalyqtyq quryltaıda Bishkektegi barlyq aýdan ataýyn qyrǵyz tiline aýystyrýǵa shaqyrǵan. Qazirgi ýaqytta Bishkekte Lenınskıı, Pervomaıskıı, Oktábrskıı jáne Sverdlovskıı aýdandary bar.