21 qyrkúıekte Reseı prezıdenti Vladımır Pýtın jarıalaǵan ishinara mobılızasıa shyn máninde tolyqqandy mobılızasıa bolyp shyǵyp, onyń toqtaǵany týraly aıtylǵanymen jer-jerde azamattardy áskerge shaqyrý jalǵasyp jatyr. Mobılızasıalanǵan jaýyngerlerdiń jaı-kúıi nashar ekeni, keı jerlerde shaqyrylǵandar esh daıyndyqsyz maıdan dalasyna jiberilip jatqany týraly aqparat kóp. VVS-diń orys qyzmeti mobılızasıalanǵandardyń aýyr jaǵdaıy týraly materıal jarıalady.
Ol jerde shaqyrylǵandarǵa eshqandaı jaǵdaı jasalmaǵany, olardy eshkim daıyndap jatpaǵany, kólikpen qamtyp, qarý berýge múmkindik joǵy týraly aıtylady.
Qazirgi ýaqytta Reseıde mobılızasıalanǵandardyń analary men áıelderi qoǵamdyq uıymdar quryp, jaqyndaryn taýyp, olardy qaıtarýǵa nemese áskerdegi jaǵdaıyn jaqsartýǵa qol jetkizýge tyrysyp júr. Ázirge olardy bılik elep otyrǵan joq.
Kreml mobılızasıa kezinde keıbir "qatelikter" baryn moıyndap, olardy sheshetinin aıtqan. Alaıda mobılızasıalanǵandar men olardyń jaqyndary áskerı bólimder men fronttaǵy jaǵdaı áli de aýyr ekenin kórsetip keledi.
