Táýelsizdik kúni qarsańynda elordada 110 oryndyq stýdentter úıi paıdalanýǵa berildi. Astanadaǵy  menedjment, bıznes jáne bilim koleji óz stýdentterin jataqhanamen qamtamasyz etti, dep habarlady elorda ákimdiginiń resmı saıty.

Stýdentter úıi Memleket basshysynyń tapsyrmasyna sáıkes memlekettik-jekemenshik áriptestiktiń negizinde júzege asqan. Jeke menshik oqý orny  ǵımaratty óz qarajaty esebinen salǵan. Endi onyń shyǵyndaryn memleket ótep beredi. Astanaǵa arman qýyp kelgen jastyń biri Oljas Tokýsh. Ol menedjment, bıznes jáne bilim kolejiniń ekinshi kýrs stýdenti. Jańa jataqhanaǵa ornalasqaly, sabaqqa ýaqytyly baryp keletinin aıtady.

Óıtkeni stýdentter úıi oqý ordasynyń aýmaǵynda ornalasqan.  Oljas Tokýsh, stýdent - Kolej bizge barlyq yńǵaı jasady. Mynandaı jataqhana saldyryp ornalastyq. Jıhaz bári jańa, as úıdegi bári jańa alynǵan. Tárbıeshi de jaqsy adam, tez tál tabysyp kettik. 

Jańa jataqhananyń ishinde stýdentterge barlyq jaǵdaı jasalǵan. Tósek-oryn, ydys-aıaqtyń bári jańa. İshinde demalys bólmesi, as úı, sport zaly, medısınalyq pýnkt te bar. Shákirtterdiń qaýipsizdigi úshin beınebaqylaý júıesi ornatylǵan. 

Qasymhan Senǵazyev, qalalyq bilim basqarmasynyń basshysy:

– Bul kolej jeke menshik. Bizdi qýantatyny bul osy kolejdiń ózi salyp jatqan jataqhanasy. Buǵan deıin bul kolejde jataqhana bolǵan joq. Jalǵa alyp, hostelderde balalar turyp jattyr. Kolejdiń terıtorıasynda ornalasqan. Ol da jaqsy. Osy jerden shyǵyp sabaqtaryna bara beredi.   Jalpy Astanada 34 kolej bar. Onda 32 myńǵa jýyq stýdent bilim alady. Al jataqhana máselesi áli de ózekti. Óıtkeni qazir bir myńnan astam kolej stýdenti jataqhanaǵa muqtaj. Jergilikti bılik bul máseleniń jaqynda sheshimin tabatynyn aıtady.