Qarjylyq monıtorıń agenttigi Bolat Nazarbaevtyń oń qoly delinetin, búginde reıderlik shabýyl jasady dep aıyptalǵan qylmystyq top múshesi Eldos Qospaev pen onyń senimdi tulǵalaryna qatysty tergeý barysy týraly habarlady.

Agenttiktiń málimetinshe, 11 adamnan quralǵan qylmystyq toptaǵy 5 adam qamaýǵa alynǵan. Al Eldos Qospaevpen qosqanda 6 adam áli izdeýde. Agenttiktiń resmı ókili qylmystyq top kásipkerlerge reıderlik shabýyl jasap, múlkin, seriktestikterdegi úlesterin tartyp alyp, kóleńkeli kásipkerlikpen aınalysqanyn aıtady. 

"2019 jylǵy 4 naýryzda Almaty qalasynda Qospaev sybaılastarymen birge bıznesti damytýǵa 160 mln teńge salǵan "Profit Trade Ltd" JSHS ıelerin úlesteriniń 40%-yn qylmystyq toptyń belsendi múshesi Imashevqa jazyp berýge májbúrlegen. Burynǵy basshylardy basshylyqtan alyp tastaǵan uıymdasqan qylmystyq top músheleri jalǵan qujat jasaý arqyly qalǵan 35 paıyz úlesti de ıemdenip alǵan. Atalǵan kompanıa alkogól ónimderin kóterme baǵada satýmen aınalysyp, turaqty tabys ákelgen. Budan bólek, 2020 jyly 30 shildede Qospaevtyń qylmystyq toby óz bıznesine 400 mln teńgeden astam ınvestısıa salǵan "Azovita Aktay" JSHS men "Azovita Atyray" JSHS menshik ıesin ómirine qaýip tóndirý arqyly qylmystyq top múshelerine kásiporyndardyń jarǵylyq kapıtalynyń 100% úlesin óteýsiz berýge májbúr etken. Joǵaryda atalǵan Qospaev bastaǵan uıym kompanıalardy baqylaýyna alyp, olardy Almaty, Atyraý, Qostanaı, Mańǵystaý oblystarynda, sondaı-aq Almaty qalasynda alkogól ónimderin zańsyz satýǵa paıdalanǵan" delingen Qarjylyq monıtorıń agenttigi taratqan aqparatta.

Budan bólek habarlamada qylmystyq top 2021 jylǵy shildede Qapshaǵaı sý qoımasynda "Kapchagai Marina Slub" JSHS-ǵa tıesili quny 2 mln dollardy quraıtyn demalys aımaǵyn kúshpen ıemdenip alǵany jazylǵan.

"Qospaev óziniń senimdi ókilderi – uıymdasqan qylmystyq top músheleri arqyly Almatynyń eń bedeldi aýdandarynyń birindegi "Esentay sity" turǵyn úı keshenin salyp jatqan "AV-Construction" JSHS-nyń 75 paıyz aksıasyna ıelik etken. Al qalǵan 25% belgili kásipker Ábdiǵapparovqa tıesili, ol 2016 jyly JSHS atynan turǵyn úı qurylysyna 31 ga aýmaqty satyp alǵan.

Kospaev pen onyń seriktesteri baıý maqsatynda páterler men komersıalyq úılerdi týystarynyń atyna rásimdeý arqyly JSHS múlkin urlaǵan. 2018 jyldyń qazan aıynan bastap Qospaev pen UQT músheleri Babaev, Ábijanov, Tanashev, Kýdráshova jáne basqa da tulǵalar 3 jer ýchaskesin, 20 keńse úı-jaıyn jáne 113 páterdi ıemdendi. Zalal quny 4,6 mlrd teńge.

Qospaev birlesken menshik ıesi Ábdiǵapparov kompanıanyń múlkin urlaýǵa baılanysty shaǵymdanbaýy úshin onyń anasy S. Júnisbekovaǵa resimdelgen 25% úlesti alyp qoıýǵa sheshim qabyldaıdy.

Kásipker Ábdiǵapparov ustalǵannan keıin qylmystyq top músheleri kásipkerdiń anasy Júnisbekovaǵa qysym jasaǵan. Júnisbekova "AV-Construction" JSHS-daǵy óz úlesin ulyn túrmeden shyǵarýǵa aıyrbastaýǵa bekinedi de uıymdasqan qylmys top músheleriniń shabýylyna tótep bere almaı, ulynyń ómiri úshin qorqyp, kompanıadaǵy úlesin eshqandaı óteýsiz aýdaryp bergen.

Tergeý aıasynda uıymdasqan qylmystyq toptyń qylmystyq jolmen tapqan 133 jyljymaıtyn múlik nysany, 11 jer ýchaskesi, 35 premıým markaly avtokólik jáne 9 mln dollar qolma-qol aqsha tárkilendi.

Sonymen qatar, Qospaev eshqandaı qujatsyz Almaty oblysynda baseıni, trenajer zaly bar sándi úı salǵan. Ol asyl tuqymdy jylqylar ósirip, jabaıy janýarlardan haıýanattar baǵyn turǵyzǵan. Haıýanattar baǵynda arystandar, aıýlar jáne basqa ańdar bolǵan.

İshki ister organdaryna 2018-2021 jyldar aralyǵynda osy úıdiń qyzmetkerin UQT músheleriniń birneshe ret zorlaý faktisi boıynsha materıal jiberildi. Reıderlik basyp alý faktisi jáne UQT jumys isteýine yqpal etken qatysýshy tulǵalardy anyqtaý boıynsha sotqa deıingi tergeý jalǵasyp jatyr" dedi agenttiktiń resmı ókili.

Buǵan deıin kásipker, Esentai City jobasynyń avtory Almas Ábdiǵapparov Orda.kz saıtyna bergen suhbatynda "AV-Construction" JSHS-degi 25 paıyzdyq úlesin reıderlik jolmen Bolat Nazarbaevtyń senimdi adamy Eldos Qospaev tartyp alǵanyn málimdegen. 

Kásipkerdiń ózi "Asa iri mólsherde senip tapsyrylǵan bóten múlkin ıemdendi (qylmystyq kodekstiń 189-baby 4-bóligi 2-tarmaǵy) dep aıyptalyp, bıyl shildede 7 jylǵa bas bostandyǵynan aıyrylǵan.