Qazaq tili tóńireginde taǵy da daý. Bul joly gúl satatyn "Almaty býket" dúkeniniń qyzmetkeri Jadyra Aqqaıyr esimdi jýrnalıske "tolyqtaı qazaqsha qyzmet kórsetilmese, tapsyrysymdy keri qaıtaryńyzdar" degen sózi úshin "siz aýrýsyz, sizge emdelý kerek" dep zekigen.

Buny Aıgerim Toqsanbek esimdi kelesi jýrnalıs facebook paraqshasyna salyp, oqıǵa kópshilik nazaryn aýdardy. Jeli qoldanýshylarynyń biri bolǵan oqıǵa boıynsha quzyrly mekemege shaǵym túsirý keregin aıtsa, biri dúkennen gúl satyp almaı, boıkot jarıalaýǵa shaqyrdy. Endi biri dúkenniń ózine habarlasyp, narazylyq tanytý kerek dep jatty. Biraz adam keıingi usynysty ilip áketip, dúkenniń jelidegi paraqshalary men Whatsapp nómerine narazylyq bildire bastady.

Dúken basynda shaǵymdanýshylardy elemegendeı bolyp, instagram-daǵy ózderi týraly jazylǵan jaǵymsyz pikirdi óshirip, pikir ıesin buǵattap otyrǵan.

Alaıda qazaqtildi azamattardyń shaǵymy tolassyz jalǵasyp, aqyry degenine jetti.

Dúken ákimshiligi aldymen qyzmetkeri renjitken jýrnalısen, artynsha Instagram arqyly kópshilikten keshirim surady. Instagram paraqshadaǵy aqparattardy qazaqshalap, Whatsapp botty eki tilde jaýap beretindeı etip ózgertip qoıdy. Whatsapp arqyly qazaqsha qyzmet kórsetýdi suraǵan klıentke jyly ǵana qazaqsha jaýap qatyp, suraǵanyn beretin boldy.