«Alataý jastary» turǵyn úı baǵdarlamasynyń qarjylandyrylýy 3,6 mlrd teńgege artady. Bul týraly Almaty oblysynyń ákimi Marat Sultanǵazıev «Zańǵar» jastar syılyǵyn saltanatty tabystaý rásiminde aıtty.

2022 jyly Almaty oblysynda jastardy turǵyn úımen qamtamasyz etý úshin «Alataý jastary» baǵdarlamasy iske qosylǵan. «Otbasy bankpen» kelise otyryp, oblys kóleminde alǵashqy jarnasyz 60 páter satyp alý maqsatynda 600 mln teńge qarjy qarastyryldy.

«Osy tyń jobaǵa qatysý úshin 1374 ótinim kelip tústi. Bul óte úlken kórsetkish. Sol sebepti, kelesi jyly «Alataý jastary» baǵdarlamasyn júzege asyrýǵa qarajat kólemi 3,6 mlrd. teńgege deıin kóbeıtildi. Bul qarjy 200 páter alýǵa múmkindik beredi», – dedi Marat Sultanǵazıev.

Sondaı-aq ol áleýmettik salanyń ishindegi túrli baǵyttardy damytý ári jastardy qoldaý úshin Almaty oblysynda birqatar baǵdarlama iske qosylǵanyn aıtty. Mysaly, 2022 jyly alǵash ret jastardyń bıznes, ǵylym, medıa, mádenıet salalaryndaǵy bastamalaryn qoldaý maqsatynda «Táýelsizdik urpaqtary» jobasyn iske asyrý úshin oblystyq búdjetten 15 mln. teńge bólinip, 15 grant taǵaıyndaldy.

Jastardyń arasynda kásipkerlikti damytý maqsatynda 2500 adam «Bastaý Bıznes» baǵdarlamasy boıynsha oqyp, 382-si grant aldy.

«Al «Dıplommen – aýylǵa» baǵdarlamasynyń aıasynda bıyl oblysymyzda 631 jas mamanǵa 193 mln. teńgege kóterme járdemaqy tólense, 319 maman turǵyn úı satyp alý úshin 1,5 mlrd. teńgege jeńildetilgen nesıe aldy. Jas mamandardy kásibı eńbek jolyna daıarlaýdy kózdeıtin «Jastar tájirıbesi» baǵdarlamasyna bıyl 902 jas azamat qatysty», – dedi oblys ákimi.