Búgin «AMANAT»-tyń barlyq óńirlik fılıalynda partıaǵa saltanatty qabyldaý rásimi ótti. Elordada Ortalyq apparatta jumysshy mamandyqtar, mádenıet, sport, densaýlyq saqtaý, BAQ, SHOB jáne basqa da salalardyń 50-den astam belsendi ókili «AMANAT» tóraǵasynyń qolynan partıa bıletin aldy.

Kezdesý barysynda Erlan Qoshanov «AMANAT» qatarynda 800 myńnan astam qazaqstandyqty biriktire otyryp, jańa jaǵdaıda óziniń kóshbasshylyǵyn saqtap qalǵanyn atap ótti.

«Bul sheshimdi árqaısyńyz oılanyp, tolǵanyp, júrekten ótkizip baryp qabyldady dep oılaımyn. Óıtkeni, bul – úlken senim ári zor jaýapkershilik. Bizdiń múddemiz bir, maqsatymyz bir. Ol – eldegi turaqtylyqty saqtaý, Táýelsizdigimizdi nyǵaıtý, ultty biriktirý. Qoǵamdy Memleket basshysynyń tóńiregine toptastyrý. Bul jolda bárimiz bir kisideı jumylýymyz kerek», - dedi Erlan Qoshanov.

Sondaı-aq «AMANAT» tóraǵasy bıyl partıa aýqymdy jańǵyrtýdan ótkenin atap ótti. Atap aıtqanda, partıanyń jańa saıası tuǵyrnamasy bekitildi, onda memlekettiń basty baılyǵy adam ekendigi naqty kórsetilgen. Belsendi azamattyq ustanymdy qalyptastyrýǵa, áleýmettik ádilettilikti qamtamasyz etýge, barlyq azamat úshin teń múmkindik jasaýǵa, jasampaz eńbek ıdeıasyn ilgeriletýge baǵyttalǵan jáne t.b. birqatar partıalyq joba men bastamalar iske asyrylýda.

Búgin partıa qataryna osy jyldyń mamyrynda terezeden qulaıyn dep turǵan 3 jasar balany aman alyp qalǵan Sábıt Shontaqbaev pen shilde aıynda janyp jatqan ǵımarattyń tóbesinen Memlekettik Eltańba men Týdy alyp shyqqan Muhamed Qanseıit qosyldy.

Sonymen qatar «AMANAT»-qa qabyldanǵandardyń qatarynda volonter Arıana Belobjıskaıa, «Sensitive» estimeıtin bıshiler teatrynyń ártisi Aınur Saınova, ánshi Qanat Úmbetov, metalýrg Nıkıta Ekel, KAZGÚÝ Ýnıversıteti Basqarma tóraǵasynyń orynbasary Aınur Káribozova, prodúser Aısáýle Ábilda, ánshi Qaraqat Ábildına jáne mýzykalyq prodúser Qydyráli Bolmanov, jýrnalıser Darhan Ábdiýahıt, Meıramgúl Mádáli bar.

Sondaı-aq, búgin partıaǵa hırýrg Oljas Janaly, muǵalim Jadyra Shábden, aktrısa Darıǵa Badyqova, qoǵam qaıratkeri Bıbigúl Nurasheva, sharýa qojalyǵynyń basshysy Qaırat Qodjahmetov, akterler Bolat Ábdilmanov pen Dýlyǵa Aqmolda, Eýropalyq quqyq jáne adam quqyqtary saraptamalyq ınstıtýtynyń dırektory Marat Báshimov, «Jer amanaty» komısıasy tóraǵasynyń orynbasary, zańger Baqytjan Bazarbek jáne basqalar kirdi.

Mýzykalyq prodúser Qydyráli Bolmanov atap ótkendeı, Ádiletti Qazaqstandy qurý jolynda elimizdiń barlyq azamaty birigýi tıis.

«Bizdiń maqsatymyz bir – ol Kók baıraǵymyzdy bıikte jelbiretip, Táýelsizdigimizdi tuǵyrly etý. Bizdiń Otanymyz bir, týymyz bir, ıdeologıamyz ben mádenıetimiz ortaq. Sondyqtan elimizdiń eńsesi budan da bıik bolýy úshin jınaǵan tájirıbemizdiń bárin usyna otyryp, janymyzdy salyp jumys isteýimiz qajet»,- dedi ol.

«Ana men bala» qaıyrymdylyq mekemesiniń dırektory Álıa Sátbaeva da óz oıyn ortaǵa saldy.

«Men Almaty oblysyndaǵy Eltaı degen shaǵyn aýyldan kelip otyrmyn. Joldasym ekeýmiz volonterlikpen belsendi aınalysamyz. Bizdi birinshi bolyp «AMANAT» partıasy qoldady. Bul – biz úshin úlken jetistik. Partıanyń arqasynda apta saıyn júzdegen muqtaj adamǵa kómek berip jatyrmyz», – dedi ol.

Aıta keteıik, «AMANAT»-tyń barlyq óńirlik fılıalynda partıa bıletin 1500-den astam adam aldy. Jalpy jyl basynan beri 29 myńnan astam qazaqstandyq partıa qataryn tolyqtyrdy.

«AMANAT» partıasynyń baspasóz qyzmeti