Almatydaǵy Respýblıka alańynda qańtar oqıǵasynyń qurbandaryna arnalǵan "Taǵzym" memorıaly ashyldy. Keshenniń ashylý rásimine prezıdent Q.Toqaev qatysty.

Prezıdent jınalǵandar aldynda sóılegen sózinde qańtar oqıǵasy týraly biraz oı qozǵady. Biraq halyqtyń beıbit narazylyǵy búlikke aınalyp ketkeniniń artynda kim turǵanyn bul joly da ashyp aıtpady. Qańtar oqıǵasy "eshqashan qaıtalanbaýy úshin biz qoldan kelgenniń bárin jasap otyrmyz" degen sózindegi "biz" degeni bılikti meńzegeni me, basqa ma, ol jaǵy da túsiniksiz.

Prezıdenttiń jumysshylardy, fermerler, dárigerler men medbıkeler, muǵalimder men oqytýshylar, ǵalymdar men mádenıet qaıratkerleri, kásipkerler men sportshylardy batyr dep atap, buzaqylardy, radıkaldar men lańkesterdi batyr etip kórsetýdiń qajeti joq degeni bir qaraǵanda durys. Alaıda Qazaqstanda saıası belsendilik úshin azamattar radıkal, lańkes atanyp ketý yqtımaldyǵy joǵary ekenin eskersek, prezıdenttiń bul sózi azamattyq qoǵamǵa qarata aıtylǵan bolýy da ǵajap emes.

Toqaev "qańtar oqıǵasy bárimiz úshin úlken sabaq boldy" degen sózinde de kópshe túrdi qoldandy. "Bılik úshin úlken sabaq boldy" emes, "bárimiz úshin" dep, sózin tynyshtyq pen turaqtylyqty basty baılyq ekenin aıtýmen sabaqtady.

"Biz qut-berekeniń bastaýy turaqtylyq ekenin uǵyndyq. El tynyshtyǵyn saqtaı bilmesek, dúnıe bir sátte astań-kesteń bolatynyn kórdik. Táýelsizdigimiz ben memlekettigimizdi kún saıyn qorǵaýymyz qajet ekenin sezindik. «Jaý joq deme, jar astynda» degen sózdiń mánin de jete túsindik. Yntymaq pen birlik bolmasa, basqa jetistiktiń bári beker ekenine kóz jetkizdik" degen sózderi "Eski Qazaqstan" jıi qoldanǵan shúkir etýge shaqyrý arqyly qoǵamdy saıası oqıǵalarǵa belsene qatystyrmaýǵa tyrysý rıtorıkasyna uqsaıdy.