Qytaıda koronavırýstyń taralýyna baılanysty jaǵdaı nasharlap barady, dep jazady BBC. Sondaı-aq Qytaı bıligi vırýs juqtyryp qaıtys bolǵandarǵa qatysty sanaq júrgizýdiń jańa ádisin engizgen. Dúnıejúzilik densaýlyq saqtaý uıymy jańa ádisti qate dep sanaıdy.

DDSU-nyń málimetinshe, Qytaıdaǵy aýrýhanalar omıkronnyń jańa túrin juqtyrǵandarǵa toly jáne oryn jetispeýshiligi de baıqalady. Qytaı bıligi osy aptada koronavırýstan 7 adam qaıtys bolǵanyn habarlady. 

Qytaıda vıdýstan qaıtys bolǵandardy sanaýdyń óz sharttary bar. Bılik ilespeli aýrýlardan nemese vırýstyń basqa janama áserlerinen emes, tek COVID-19 týdyrǵan respıratorlyq aýrýdyń sebebinen qaıtys bolǵandardy ǵana esepke almaq. 

"Sanaqtyń bul ádisi DDSU usynymdaryna sáıkes kelmeıdi. Nátıjesinde COVID-19-dan bolatyn ólim deńgeıi tómen kórsetiletin bolady", - deıdi DDSU. 

Beıjińdegi BBC agenttiginiń dereginshe, Qytaıdaǵy aýrýhanalarda uzyn-sonar kezek jáne dári-dármekke suranys óte joǵary. Al Qytaıdyń CCTV ulttyq telearnasy Beıjińdegi Chaoıan aýrýhanasy óz resýrstaryn ulǵaıtýǵa nıetti ekenin, óıtkeni kelgen naýqastardyń sany 4 esege óskenin habarlady.

Osy aptada Shanhaı úshin qosymsha 230 myń aýrýhana tósegi bólingen. Budan bólek, 16-20 jeltoqsan aralyǵynda qalada ótken jyldyń sáıkes kezeńimen salystyrǵanda jedel járdem shaqyrýlarynyń sany eki eseden asqan. 

Reuters saıtynyń habarlaýynsha, Shanhaıdaǵy aýrýhana basshylyǵy qyzmetkerlerine COVID-19-ǵa qarsy "qasiretke toly shaıqasqa daıyndalyńdar" dep buıryq bergen. Óıtkeni, qaladaǵy 25 mln turǵynnyń jartysy KVI juqtyrady dep kútilýde. Sebebi vırýs qala arasynda eshqandaı júıesiz taralyp jatyr. 

Brıtandyq Airfinity zertteý kompanıasy Qytaıda kún saıyn 5 myńnan astam adam koronavırýstan qaıtys bolýy múmkin ekenin málimdegen bolatyn. Al Ulttyq juqpaly aýrýlar ortalyǵynyń dırektory Chjan Venhýn Qytaıda bir apta ishinde COVID-19 juqtyrǵandar sany artyp, antırekord ornaıdy degen boljam aıtty. 

Tanymal ǵalym ári medık Almaz Sharman qazaqstandyqtardy Qytaıdaǵy dúrbeleńnen qoryqpaýǵa shaqyrdy, dep jazady informburo.kz. 

"Qytaı "nóldik tózimsizdik" saıasatynan keıin karantın shekteýlerin birden alyp tastady. Sol sebepti qytaılardyń kóbinde ujymdyq ımýnıtet qalyptaspaı, qorǵansyz qaldy. Al bizde ujymdyq ımýnıtet jaqsy qalyptasty. Bul, árıne, bizdiń elde eshkim koronavırýs juqtyrmaıdy degendi bildirmeıdi. Tek jaǵdaı Qytaıdaǵydan qaraǵanda jeńil ótetin bolady", dedi Almaz Sharman.