"Adal"-dyń qyzmeti toqtatyldy. Partıanyń "AMANAT"-qa ótýi tolyq aıaqtaldy

/image/2022/12/26/crop-9_3_272x484_crop-22_12_1415x2515_fotokolladg.jpg

Adal partıasy qyzmetin toqtatty. Bul týraly ádilet mınıstrligi habarlady, dep jazady KazTAG agenttigi.

Azamattyq kodekstiń 45-babyna sáıkes, 2022 jylǵy 20 jeltoqsanda Adal saıası partıasy resmı túrde qyzmetin toqtatqany týraly qujat tirkelgen. Mundaı sheshimge partıanyń 2022 jylǵy 17 naýryzda ótken kezekten tys sez ben "AMANAT" partıasynyń 2022 jylǵy 26 sáýirde ótken kezekten tys HHİİİ sezindegi sheshim negiz bolǵan. Osylaısha, Adal partıasy tolyqtaı AMANAT partıasynyń quramyna ótti.

"Ádilet" jáne "Rýhanıat" partıalarynyń birigýi nátıjesinde qurylǵan partıa tirkelgen 2013 jylǵy 26 sáýirde "Birlik" degen atpen tirkelgen.

2021 jylǵy parlament saılaýy qarsańynda partıa rebrendıng jasap, "Adal" degen atty aldy. Saılaý kompanıasy kezinde jýrnalıs Maqsat Tolyqbaı, bloger Dáýlet Muqaev sekildi elge belgili adamdardy qataryna tartyp, úgit-nasıhat jumysyn belsendi júrgizgen.

Alaıda saılaý nátıjesi boıynsha májiliske ótýge múmkindik beretin 7 paıyzdy jınaı almaı, parlamentke ókilin jibere almady.

Partıanyń bet-beınesindeı bolyp ketken Maqsat Tolyqbaı partıa kelesi saılaýǵa deıin qalyń uıqyǵa ketetin partıa bolmaıdy, jumysy jandana beredi degen syńaıda pikir bildirgenimen, bıyl naýryz aıynda partıa saıası keńesi AMANAT-qa qosylatynyn málim etti.

"Adal partıasynyń búgingi kúnge deıingi tyń ıdeıalary men zamanaýı tehnologıalyq kózqarastary Prezıdentimizge salmaqty qoldaý bola alady dep esepteımiz. Kez kelgen ózgeriste sabyrly qalpymen salmaqty sheshim qabyldaıtyn Qasym-Jomart Toqaevtyń jumys stıli bizge unaıdy. Ol qazir ádiletti memleket qurýdy kózdep otyr. Memleket basshysynyń búgingi Qazaqstan halqyna Joldaýy aıasynda aıtqan saıası reformalary sonyń taǵy bir dáleli. Biraq bul aıtylǵan reformalar qalaı júzege asyrylady? Másele osynda. Ol úshin búkil qazaq qoǵamy birigýi qajet. Prezıdent reformalarynyń jergilikte jerde tıisti deńgeıde iske asyrylmaı qalý qaýipi joǵary. Qasym-Jomart Kemeluly aıtqan «Dostarǵa – bárin, qalǵanyna zań boıynsha» degen qaǵıdamen kelgen qoǵamnyń ótkenin umytpaýymyz kerek. Sol úshin, biz, adaldyqtar Jańa Qazaqstandy qurýǵa belsendi qatysyp, elimizdegi oń ózgeriske úles qosqymyz keledi. Partıalastarymyzben aqyldasa kele, Adal-dyń Saıası keńesinde prezıdenttik Amanat partıasyna qosylý týraly biraýyzdan sheshim qabyldadyq" degen bolatyn adaldyqtar.

"Adal"-dyń qyzmeti toqtatyldy. Partıanyń "AMANAT"-qa ótýi tolyq aıaqtaldy

Qatysty tegter :

Pikir qaldyrý

Qatysty Maqalalar