27 jeltoqsan kúni buqtyrylǵan et ónimderin shyǵaratyn "Kýbleı" sotyna qatysty iste sýdıa sheshim shyǵarýy múmkin. Osyǵan baılanysty zaýytta jumys isteıtin qyzmetkerler ýaıymdap otyrǵandaryn aıtady.

"Qorqynysh degen bizde úlken. Osyny estigennen beri úreıge tústik. Meniń bul jerde jumys istep jatqanyma 20 jyldaı ýaqyt boldy. Jap-jas bolyp "Kýbleı" zaýytyna kirdik, balalarymyzdy ósirdik, úılendirdik, úı saldyq. Bala-shaǵamyzdy osy jumystyń arqasynda asyrap otyrmyz. Erteń bul zaýyt jabylsa, qaıda baramyz, qalaı kún kóremiz. Bilmeımin",- dedi Kýbleı zaýytynyń jumysshysy Alýan Amangeldiqyzy.

Alýannyń áriptesteriniń barlyǵy osyndaı eki udaıy kúıde, ýaıymmen otyrǵandaryn jetkizdi.

Esterińizge sala keteıik, "Kýbleı" zaýyty men Oral qalasy ákimdiginiń arasynda daý jerge qatysty bastalǵan bolatyn. Sebebi, Oral qalasynyń ákimdigi "Kýbleı" zaýytynyń aýmaǵynan turǵyn úı salýǵa jer berip, ol jerge úıler salynyp, qazir qalǵan qurylys toqtap tur. Bul jerde sol turǵyn úıge qarajattaryn salǵan úleskerler de zardap shegýde. Eger, sol salynǵan úılerge halyq qonystanatyn bolsa, "Kýbleı" zaýyty jabylýy múmkin. Sebebi, zaýyttyń sanıtarlyq talaptary saqtalmaýda. Zańǵa sáıkes, zaýyt, kásiporyndar turǵyn úılerden 100 metr alys jerde ornalasýy tıis. Demek, buqtyrylǵan et shyǵaratyn zaýytqa erteńgi kúni turǵyndar tarapynan jaǵymsyz ıisi shyqty degen syndy túrli shaǵym túsýi múmkin.

Sot eki tarap yrmaǵa kelýi kerek dep sheshim shyǵarǵan bolatyn. Sot osy sheshimdi oqı salysymen zaldaǵylar ý-shý bolyp, tipti turǵynnyń biri talyp qalǵan bolatyn. Sebebi, medıasıaǵa eki tarap ta qarsy boldy, sýdıa Jurabaev "Kýbleı" men Oral qalasy ákimdigi arasyndaǵy isti toqtatyp qoıyp, jeltoqsannyń 22 kúni is qaıta jalǵasty.

"Biz turǵyndarmen sottasyp jatqan joqpyz. Biz osyndaı zańsyzdyqqa barǵan ákimdiktegilermen sottasyp jatyrmyz. Ákimdikten kelgen ókilder zań "Kýbleı" zaýytynyń jaǵynda ekenin túsinip otyr. Olar biz osy sot bitkennen keıin Batys Qazaqstan oblysynyń ákimi Isqalıevti qylmystyq jaýapkershilikke tartý jóninde suraqty kóteretinimizdi sezedi. Sonymen qatar qylmystyq jaýapkershilikke BQO ákimi apparatynyń basshysy Abat Shynybekovti de tartý máselesin kóteremiz. Sebebi, ol qujatqa qol qoıǵan. Zańsyz jobany jasap, qol qoıǵandardyń barlyǵy jaýapkershilikke tartylýy kerek",- dedi "Kýbleı" zaýytynyń zańdy ókili Baqytjan Bazarbek.

Sáýir aıynda Indýstrıa mınıstrliginiń ózi Oral ákimdigi bas jospardy saqtaýy kerek. Kýbleı zaýytynyń mańynda turǵyn úı salýǵa bolmaıdy dep jaýap bergen. Biraq soǵan qaramastan isti sozbaqqa salyp, úkimettiń ustanymyn bilmek bolyp, qujatty úkimetke qaıta jibergen. Qazir "Kýbleı" zaýytynyń zańdy qorǵaýshysy, advokat sýdıa sheshim shyǵarýǵa qorqyp otyr ma degen kúmánǵa kele bastady.

Aıta keteıik, buqtyrylǵan et ónimderin shyǵaratyn Kýbleı zaýytynda 700 adam jumys isteıdi, onyń syrtynda osy kásiporynǵa etterin ótkizip otyrǵan 3 myńǵa jýyq sharýa ıesi taǵy bar. Barlyǵy taqymyn qysyp, sottyń ádil sheshimin shyǵarǵanyn kútip otyr.