Búgin Májilistiń jalpy otyrysynda jerlerdiń paıdalanylýy men qorǵalýy máseleleri boıynsha keıbir zańnamalyq aktilerge engiziletin ózgerister men tolyqtyrýlar qaraldy. Aýyl sharýashylyǵy mınıstri Erbol Qarashókeev bıyl 5,2 mln gektar jer memleket menshigine qaıtarylǵanyn aıtty. Degenmen májilis depýtattary buǵan senbeıtinin jetkizdi. 

"Óskemenge barsańyz, jerdiń bári Danıal Ahmetovtiki, al Pavlodarǵa barsańyz Baqaýovtiki. Astananyń mańaıynda Ómirzaq Shókeevtiki. Ony aıtýǵa bári qorqyp otyr. Alaıda sizdiń baıandamańyzda aıtylǵan myńdaǵan gektar jer qaıtaryldy degen sóz – ótirik. Halyqtyń bári narazy bolyp otyr. Mal baǵyp otyrǵandarǵa jer jetpeı jatyr. Sizder osy ádemi baıandamanyń ornyna osyny qashan qolǵa alasyzdar. Aty-jónin jazyńyzdar. Taqtany ilip qoıýǵa nege uıalasyzdar? Burynǵy otyrǵan baılar solaı otyr", - dedi depýtat Berik Dúısenbınov. 

Alaıda minberde suraqqa jaýap bergen Aýyl sharýashylyǵy mınıstri Erbol Qarashókeev depýtattyń bul oıymen kelispeıtinin jetkizdi.

"Ákimderge tıispeı, jerlerdi qorǵap otyr degendi men qabyldaı almaımyn. Sebebi 5,2 mln gektar jerdi qaıtardyq. Ol kimniń jerleri? Sol ákimderdiń jerleri, olıgarhtardyń jerleri. Endigi jyly da 5 mln gektar jerdi qaıtaramyz. Ol jumysty qazir jandandyryp jatyrmyz. Biz zańǵa sáıkes jumys isteımiz. Bar jumysty joq dep aıtýǵa bolmaıdy", - dep jaýap berdi mınıstr.

Keıin Erbol Qarashókeev pen Berik Dúısenbınov birlesip aımaqtardy aralaıtyn bolyp kelisti.