Senattyń jalpy otyrysynda "Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly" zańy qabyldandy. Qarjy vıse-mınıstri Erjan Birjanovtiń aıtýynsha, halyqaralyq tájirıbeni eskere otyryp, rásimderdiń 3 túrin engizý usynylyp otyr. 

2022 jyldyń 1 qazanynyndaǵy málimetter boıynsha 7,8 mıllıon adamnyń ekinshi deńgeıli bankterge, mıkroqarjy uıymdaryna jáne kolektorlyq agenttikterge bereshegi bar.

Zańda sottan tys bankrottyq, sottyq bankrottyq jáne tólem qabilettiligi rásimderin qalpyna keltirý arqyly tólem qabilettiligin qalpyna keltirý múmkindigi qarastyrylǵan. Barlyq úsh rásimdi tek boryshker ǵana bastaıdy, ıaǵnı kredıtordyń olardy boryshkerge qoldanýǵa quqyǵy joq.

Sottan tys bankrottyq rásimi tómendegideı jaǵdaılarda qoldanylady:

– bankterge, mıkroqarjy uıymdaryna jáne kolektorlarǵa bereshek 4,9 mln teńgeden (1600 AEK) aspaýy kerek;

– resmı kirisi joq nemese tabysy eń tómengi kúnkóris deńgeıinen (36 018 teńge) aspaýy kerek.

Sottan tys bankrottyq rásimderi «Elektrondyq úkimet» veb-portaly arqyly iske asyrylady.

Budan bólek boryshkerdiń turaqty tabysy bolǵan jaǵdaıda qaryzdy tóleý úshin (5 jylǵa deıin) sot tártibimen bólip tóleý josparyn alý múmkindigi qarastyrylǵan. Atalǵan qarjy baqarýshymen birlesip ázirlenip, sotpen bekitiledi. Bul prosedýranyń artyqshylyǵy, keıin adam "bankrot" degen mártebesin almaıdy. 

Boryshker bankrottyq rásimdi iske asyrǵannan keıin: 

• 5 jyl boıy nesıe ala almaıdy; 
• 7 jyldan keıin ǵana bankrottyqqa qaıta júgine alady; 
• 3 jyl boıy azamattyń qarjylyq jaǵdaıyna monıtorıń júrgiziledi.