Búgin Oqý-aǵartý mınıstri qyzmetinen bosatylǵan Asqat Aımaǵambetov ózimen 3 jarym jyl eńbek etken adamdarǵa alǵys bildirip, mınıstr bolyp turǵanda júzege asyrǵan birsypyra ister týraly aıtty.

"Osy ýaqyt ishinde maǵan júktelgen senimdi aqtaýǵa jáne ashyq bolýǵa, jumysta tıimdi ári paıdaly bolýǵa tyrystym" dep sóz bastaǵan ol Bilim jáne ǵylym salasyna jaýapty bolǵan mınıstr retinde esep berip, atqarylǵan jumystar týraly aıtýdy jón sanaǵanyn jetkizdi.

"Aldaǵy ýaqytta mınıstr laýazymynda qabyldanǵan árbir sheshim týraly egjeı-tegjeıli esep berýdi jáne bul sheshimderdiń logıkasy týraly aıtýdy josparlap otyrmyn. Ony kez kelgen adam kóre alady. Prezıdenttiń qoldaýy arqasynda biz óte mańyzdy qujatty - «Pedagog mártebesi týraly» zańdy qabyldadyq. Sonyń arqasynda túbegeıli ózgerister boldy, mysaly, jalaqyny kóterý, qosymsha tólemder, mindetke jatpaıtyn qyzmetterden bosatý, bes kúndik jumys aptasyna aýysý, 30 jyl eńbek ótili bar muǵalimderdi UBT-dan bosatý jáne 25 jyldan astam jumys ótili bar muǵalimderge tósbelgi taǵaıyndaý jáne t.b.

Biz balabaqsha tárbıeshilerine, kolej muǵalimderi men ýnıversıtet oqytýshylaryna da qolaıly jaǵdaı jasaýǵa tyrystyq.

Tárbıeshilermen, oqýshylarmen, stýdenttermen, ustazdarmen, mektep, kolej dırektorlarymen, oqytýshylarmen, rektorlarmen, ǵalymdarmen, bilim basqarmalary men vedimistik baǵynysty uıymdardyń basshylarymen kóptegen kezdesý ótkizdim. Men úshin ártúrli deńgeıdegi bilim berý ókilderiniń pikirlerin tyńdaý jáne qandaı da bir sheshim qabyldaǵanda barlyq máseleniń «oń» jáne «teris» jaqtaryn tarazylaý mańyzdy boldy" degen ol sheshimderin qoldaǵan muǵalimderge, ıdeıa men alǵa qoıylǵan mindetti iske asyrǵan mınıstrliktegi áriptesterine, qoldaý bildirip, syn aıtqan qoǵam qaıratkerleri men belsendilerge,mınıstrlik jańalyqtaryn jarıalaǵan jýrnalıserge alǵys aıtty.

Sóziniń sońynda eks-mınıstr qoǵamǵa ashyq ekenin atap ótti.