Búgin parlament palatalarynyń birlesken otyrysynda depýtattar eks-prezıdent Nursultan Nazarbaev pen onyń otbasyna aıryqsha quzyretter men kepildikter berip kelgen Elbasy týraly zańnyń kúshin joıý týraly zań jobasyn maquldady. Alaıda bul – Nursultan Nazarbaevtyń otbasy múshelerin ǵana ımýnıtetten aıyrady. Al eks-prezıdenttiń ózi Prezıdent týraly zańnyń burynǵy prezıdentter jaıly VI taraýyna saı kóptegen kepildikterge ıe.

Máselen, eks-prezıdentke, onyń abyroı men qadir-qasıetine eshkim tıisýine bolmaıdy. Eks-prezıdenttiń abyroıy men qadir-qasıetine qol suǵýshylyq zań boıynsha qýdalanady.

Nazarbaev memleket esebinen páter men memlekettik saıajaı, jeke kúzet, júrgizýshi jáne derbes avtomobılmen qamtamasyz etiledi.

El ishinde tegin júrip-turyp, medısınalyq, sanatorıı-kýrorttyq jerlerde tegin emdeledi.

Prezıdent jalaqysynyń 80 paıyzy mólsherinde zeınetaqy alady. Ári ol prezıdent jalaqysy ósken saıyn, arttyrylyp otyrady.

Prezıdent bolyp turǵan tustaǵy jeke muraǵaty men jeke kitaphanasynyń materıaldary óz menshiginde bolady.

Nazarbaev prezıdent kezinde qabyldaǵan sheshemderi men jasaǵan áreket úshin jaýap bermeıdi. Eks-prezıdentti tek memleketke opasyzdyq jasady dep tanylǵan jaǵdaıda ǵana jaýapqa tartýǵa bolady.