Byltyrǵy qańtar–qarasha aılarynda respýblıkada 13,4 myń jol-kólik oqıǵasy tirkeldi, bul bir jyl burynǵydan 9,2% kóp. Onyń ishinde 1,7 myńy (nemese 13%-y) kisi ólimimen aıaqtalǵan. Mundaı derekti ranking.kz portaly keltirip otyr.

Tirkelgen quqyq buzýshylyqtardyń jalpy sanynyń 11,6 myńy kólik júrgizýshileriniń kinásinen, 378 derek jaıaý júrginshilerdiń kinásinen, úsh derek komýnaldyq qyzmetterdiń kinásinen, bir derek jol qyzmeti men merdigerlerdiń kinásinen bolǵan.

Qazaqstanda JKO eń kóp bolatyn kún – dúısenbi. JKO senbi jáne seısenbi kúnderi de jıi bolady. Eń az bolatyn kún – beısenbi.

Eldegi barlyq jol-kólik oqıǵalarynyń 68%-y kúndiz, 19%-y ymyrtta, 12%-y túnde bolǵan.

Eń kóp tirkelgen JKO jaıaý júrginshilerge soqtyǵysýǵa qatysty: 5 myń oqıǵa. Odan keıin kólikterdiń soqtyǵysýy (3,2 myń) jáne aýdarylý (1,2 myń) jaǵdaılary. Bulardan keıin eń kóp bolatyn oqıǵalar kedergilerge soǵylý (514) jáne jolaýshylardyń qulaýy (339) jaǵdaılary.

Óńirler boıynsha jazataıym oqıǵalardyń eń kóbi Almatyda tirkeldi: 3,5 myń JKO, bir jylda 20,6% kóbeıgen. Odan keıin dástúrli túrde Almaty (1,9 myń jaǵdaı, 8,2% azaıǵan) jáne Jambyl (1,4 myń, 21,9% kóbeıgen) oblystary.

Eń az jazataıym oqıǵalar jańadan qurylǵan oblystar – Ulytaý, Abaı jáne Jetisý oblystarynda (tıisinshe 33, 94 jáne 226 jaǵdaı) tirkeldi. Bul óńirler 2022 jyldyń ortasynda ǵana qurylǵandyqtan, kórsetkish tómen bolyp otyr.

Kisi ólimine ákep soqqan jaǵdaılar kóbine Túrkistan oblysynda boldy: jalpy JKO sanynyń 37%-y. Odan keıin Qaraǵandy (33,9%), Ulytaý (33,3%), Abaı (29,8%) jáne Qyzylorda (23,4%) oblystarynda. JKO saldarynan kisi ólimi tirkelý kórsetkishi eń az Almaty (bar bolǵany 2,4%) men Astana (3,5%), sondaı-aq Jambyl oblysynda (10,1%) tirkelgen.