Almatyǵa Qańtar oqıǵasyn jáne Janbolat Mamaıdy qylmystyq qýdalaý isin tergeý boıynsha Ulybrıtanıa Lordtar palatasynyń múshesi Ken Makdonald (Lord Macdonald KT KC of River Glaven) bastaǵan Komısıa ókilderi keldi. Bul týraly quqyqqorǵaýshy, jýrnalıs Inga Imanbaı habarlady.
"Komısıa quramynda halyqaralyq quqyqtyq kómek kórsetý kompanıasy Bindmans LLP jetekshisi Taıab Alı men basqa da arnaıy mamandar da kelip jetti. Birneshe kúnnen keıin Almatyǵa Komısıanyń taǵy bir múshesi - Ulybrıtanıa parlament depýtaty ser Robert Baklend te at basyn burmaq. Birneshe kúnniń ishinde Komısıa músheleri Qańtar oqıǵasyna qatysýshylarmen, azaptaý qurbandarymen, qasiretti kúnderi týǵan-týysynan aırylǵandarmen jáne birqatar quqyq qorǵaýshylarmen, jýrnalısermen de kezdespek. Sonymen birge, Komısıa ókilderi qazirgi tańda úı qamaqta otyrǵan Janbolat Mamaımen de sóılesýdi josparlap otyr. Buǵan baılanysty Mamaı taraby sotqa arnaıy qaǵazdy da joldady. Odan bólek, Komısıa Astanaǵa baryp, Qazaqstannyń laýazymdy ókilderimen de kezdespek. Osy aptada Almatyda Komısıa ókilderi arnaıy baspasóz máslıhatyn ótkizip, qazaqstandyq jýrnalıserdiń saýaldaryna da jaýap beretini de belgili" delingen Inga Imanbaıdyń facebook paraqshasyndaǵy jazbada.
Sondaı-aq quqyqqorǵaýshy Qazaqstanǵa Ulybrıtanıa parlamenti depýtattary qurǵan Komısıanyń kelýi halyqaralyq qaýymdastyq eldegi jappaı adam quqyǵyn buzý jaǵdaılaryna kóz jumyp qaramaıtynyn bildiretinin, Adam quqyqtary men zańdylyqty saqtaý jónindegi Qazaqstan halyqaralyq búro óz tarapynan Komısıa jumysyna jan jaqty kómek berýge ázir ekenin jetkizgen.
Pikir qaldyrý