Aqmola, Abaı, Aqtóbe, Almaty, Atyraý, Shyǵys Qazaqstan, Jambyl, Batys Qazaqstan, Qaraǵandy, Qostanaı, Soltústik Qazaqstan, Túrkistan jáne Jetisý oblystary kóktemgi sý tasqyny bolýy yqtımal aımaqtarǵa jatqyzylyp otyr. Bul týraly úkimet otyrysynda Tótenshe jaǵdaılar mınıstri Iýrıı Ilın málim etti.

Mınıstr byltyrǵy sý basýdyń negizgi sebepteri retinde ózen arnalarynyń tolyp qalýy men baldyrlanýyn, drenajdyq-aryq júıeleriniń bolmaýyn, sý qorǵaý beldeýlerinde úıler salý sıaqty jaǵdaılardy atady.

Onyń aıtýynsha, búgingi tańda sý basý qaýpi aımaǵynda 255 eldimeken, sý jaıylýǵa beıim 482 avtomobıl jáne 600 astam temirjol ýchaskeleri, sý qorǵaý beldeýlerinde 309 eldi meken bar.

Sý tasqyny jaǵdaıy qıyndaǵanda jedel den qoıý maqsatynda 35 myńnan astam adam, shamamen 11 myń birlik tehnıka, 12 dana «Qazavıaqutqarý» áýe kemesi, 650 astam júzý quraly jáne 3 myńnan artyqmotopompa sanynda kúshter men quraldar toptamasy ázillengen.

Premer-mınıstr Álıhan Smaılov óńirler sý tasqynyna tolyq daıyn emestigin aıtyp, Almaty, Abaı, Atyraý, Batys Qazaqstan oblystarynda, Astanada jáne Almatyda drenajdyq júıeniń qatty jaýyn-shashyn men tasyǵan selge shamasy jetpeıtinin jetkizdi.

Úkimet basshysy barlyq óńir ákimderi qardy, ásirese, aýyldyq eldi-mekenderde ýaqytyly shyǵarýdy qamtamasyz etýi tıis ekenin atap ótip, gıdrotehnıkalyq qurylystardaǵy jaǵdaı alańdaýshylyq týdyratynyn aıtty.

– Aryqtardy, drenajdyq júıelerdi, nóser kárizderin, ózen arnalaryn tazartyp, ýaqytsha bógetter turǵyzý kerek. Óńir ákimderi Jol kartasynyń is-sharalaryn sapaly iske asyrýdy qamtamasyz etip, ótken jyldardan oryndalmaı qalǵan problemalyq máselelerdi sheshýge mindetti. Bul rette tótenshe jaǵdaılar mınıstri aıtqan barlyq usynystar men sharalardy eskerý qajet. Ákimder sý tasqynyn ózderiniń qatań baqylaýynda ustasyn, – dedi premer-mınıstr.