Belgili kompozıtor, Qazaqstannyń eńbek sińirgen qaıratkeri, telejúrgizýshi Arman Dúısenov ómirden ótti.

ZTB jelilik basylymynyń dereginshe, sazger júrek talmasynan qaıtys bolǵan.

Arman Narymbaıuly Dúısenov 1974 jyly Oral qalasynda dúnıege kelgen. Qurmanǵazy atyndaǵy memlekettik konservatorıany orkestr ártisi mamandyǵy boıynsha támámdaǵan. Budan bólek álemdik klasıkalyq mýzyka, fólklorlyq etnografıa baǵyttary boıynsha kásibiı bilim alǵan.

Eńbek joly 1990 jyly Pavlodar qalasynda ótken HHİİ respýblıkalyq jas oryndaýshylar baıqaýynda jeńiske jetkennen keıin bastalǵan. Túrli janrda án shyǵaryp, biraz ánderin ózi de oryndaǵan.

Tanymal telebaǵdarlamalarda prodúser, telejúrgizýshi bolyp, medıakeńistikte óz ornyn alǵan.

Sońǵy jyldary biraz ýaqyt "Qazaqkonsert" birlestigi basshysynyń orynbasary bolyp qyzmet etti.

Suhbattarynyń birinde karantın kezinde aqyn Abaı Qunanbaıulynyń árýaǵyna arnap aqyn Iran Ǵaıyptyń óleńine eki án jazǵanyn aıtqan.

Altynaı Jorabaevanyń oryndaýyndaǵy "Aǵajan" áni, Ulyqpan Joldasovtyń oryndaýyndaǵy "Shattyǵym sensiń" jáne Dınara Qyryqbaevamen birge salǵan "Ustazym meniń" áni ony kompozıtor retinde kópke tanytqan.

Kompozıtor qazaqtyń tól óneri men búgingi nemese keshegi klasıkalyq ónerdiń ozyq úlgilerin kásibı túrde ushtastyryp, qazaqtyń mýzyka ónerin damytýdy jalǵastyrýdy kásibı ómiriniń ózekti taqyryby dep bilgen.