Búgin «AMANAT»-tyń atqarýshy hatshysy Elnur Beısenbaev partıanyń Respýblıkalyq qoǵamdyq qabyldaý bólmesiniń jumysymen tanysty. Ol is-shara barysynda BAQ ókilderiniń suraqtaryna jaýap berdi.

Atqarýshy hatshy qazirgi tańda partıa óz saılaýaldy baǵdarlamasyn ázirlep jatqanyn jetkizdi.

«Bul jumysqa májilistiń eks-depýtattary, partıa janynan qurylǵan keńesterdiń músheleri, bilikti saıasattanýshylar, ekonomıser tartyldy. Al saılaýaldy baǵdarlamaǵa usynystar halyqtan tikeleı jınalady. Partıanyń Jarǵysyna sáıkes, baǵdarlamalyq qujattardy qabyldaý Sıeziń quzyrynda. Jer-jerdegi partıalastardyń talqylaýynan jáne sarapshylardyń taldaýynan ótken saılaýaldy baǵdarlama aldaǵy Sıeze qabyldanady», - dedi E.Beısenbaev.

Óz kezeginde, Respýblıkalyq qoǵamdyq qabyldaý bólmesiniń meńgerýshisi Álıa Sadyrbaevanyń aıtýynsha, Saılaý týraly zańǵa sáıkes, partıanyń qoǵamdyq qabyldaýlary halyqqa kómek berý, keńes berý jumysyn toqtatty. Bul kezeńde partıa azamattardan tek usynys-tilekter jınap, saraptaýmen aınalysady.

«Azamattardyń talap-tilekteri qoǵamdyq qabyldaýlardan bólek Call-ortalyqtar, partıanyń saıty men elektrondy poshtasy, egov.kz elektrondy úkimet portaly, sondaı-aq, WhatsApp messenjeri arqyly qabyldanady. Sońǵy jeti-segiz kúnde bizdiń qoǵamdyq qabyldaýlarǵa 500-ge tarta usynys-tilek kelip tústi. Olar partıanyń saılaýaldy baǵdarlamasyn ázirleý kezinde eskeriledi», - dedi Á.Sadyrbaeva.

Sonymen qatar, Elnur Beısenbaev májilis saılaýyna usynylatyn partıalyq tizim qandaı prınsıpter boıynsha jasaqtalatynyn atap ótti. Onyń aıtýynsha, úmitkerlerdi tańdaýdaǵy basty prınsıp: ashyqtyq, ádildik jáne jańarý.

«Búkil proses ashyq ótedi. Biz barlyq usynysqa ashyqpyz, irikteý prosesi ádil ótedi. Eń belsendi, bilimdi, bilikti azamattar osy tizimge enýi kerek. Oǵan qosa, ár túrli jas ókilderi, jastar, áıelder, túrli mamandyq ıeleri bolýy tıis. Ókilettilik degenimiz osy. Buǵan qosa, partıa tizimderinde jańa esimder kóp bolady», - dedi atqarýshy hatshy.

Búginde jer-jerde saılaý shtabtary qurylyp, partıa belsendileri men eriktileri aldaǵy úgit jumysyna qyzý daıyndyqty bastap ketti.

«Biz ashyq ta tartysty básekege daıynbyz. Baǵytymyz – Ádiletti Qazaqstan, maqsatymyz – memlekettiń tutastyǵy, Táýelsizdiktiń baıandy bolýy», - dep túıindedi E.Beısenbaev.

Aıta keteıik, elimizdiń barlyq óńirinde «AMANAT»-tyń 243 qoǵamdyq qabyldaý ortalyǵy jumys isteıdi. Byltyr bul ortalyqtarǵa 134 myń adam muń-muqtajyn, aryz-shaǵymyn aıtyp kelgen. Olardyń 90%-ynyń máselesi oń sheshilse, qalǵan 10%-nyń aryz-shaǵymy qaralyp jatyr. Budan ózge, byltyr 984 aýyldyq eldi mekende 744 kóshpeli qoǵamdyq qabyldaý uıymdastyrylyp, 7,4 myń ótinim kelip tústi. Olardyń úshten biri dereý sheshilse, 60%-y boıynsha máseleni zań aıasynda sheshý joldary túsindirildi, al qalǵan 9%-y qazirgi tańda oryndalý ústinde.

 «AMANAT» partıasynyń baspasóz qyzmeti