Almaty qalasy ákimdigi men «Almatybasjospar» ǴZI» JSHS-niń bastamasymen Almaty qalasynyń 2040 jylǵa deıingi jańa Bas josparynyń úsh kúndik qoǵamdyq talqylaýy aıaqtaldy. Jalpy alǵanda qalanyń barlyq segiz aýdanynyń turǵyndary men sarapshylar Bas jospardyń kólik jáne áleýmettik ınfraqurylymdy damytý, ınjenerlik jelilerdi jańǵyrtý, sonymen qatar, aýanyń lastaný máselesin sheshý joldary men ekologıalyq jaǵdaıdy jaqsartý sharalaryn qamtıtyn bólimderin talqylady.

Jańa Bas jospar qala qurylysynyń álemdik tájirıbesin eskerip, Almaty qalasyn damytýdyń vektory bolyp tabylatyn, aglomerasıamen tıimdi baılanysqan úılesimdi megapolıs, qala turǵyndary men qonaqtarynyń turýy, jumys isteýi jáne demalysy úshin tartymdy jáne jaıly oryndy kózdeıdi.

2022 jyldyń shildesinen bastap «Almatybasjospar» ǴZI» JSHS «Turǵyndar saýalnamasy» iri qalalyq saýalnamasyn júrgizip jatyr, onyń derekteri polıortalyqtardyń bas josparlaryna tehnıkalyq sharttardy daıyndaý úshin qajet. Joba qaladaǵy adamnyń tájirıbesine júginýge, qalaı ómir súretinin, jolǵa qansha ýaqyt jumsaıtynyn, ne mazalaıtynyn, ne usynatynyn, qalanyń damýyna qatysýǵa qalaı daıyn ekenin bilýge ​​múmkindik beredi. Bas jospardy talqylaý barysynda kóterilgen máseleler/suraqtar men usynystardyń kópshiligi «Turǵyndar saýalnamasyn» zertteýdiń aldyn ala nátıjelerimen rastalady. Búgingi tańda 11 myń saýalnama jınaqtalǵan.

Mamandar Bas jospardyń qorshaǵan ortaǵa, qoǵamdyq kólikke, soltústik baǵyttaǵy ınfraqurylymdy damytýǵa qatysty bólimderi boıynsha durys usynystar jasady. Mamandar taýlardy qorǵaý qajettigin de atap ótti. Barlyq usynys qala qurylysy qujatynda eskeriledi.

Qoǵamdyq talqylaýlar barysynda barlyq segiz aýdannyń turǵyndary óz shaǵyn aýdandarynyń áleýmettik nysandar, ınjenerlik jeliler jáne t.b. ınfraqurylymdyq qurylysty damytý barysymen tanysty. Olardyń suraqtary men usynystary negizinen naqty salalarǵa qatysty boldy jáne bas jospardyń negizgi taraýlaryna áser etken joq. Degenmen jumys tobynyń músheleri olardyń eskertýlerin qarap, eskeretin bolady.

İle Alataýynyń etegindegi baý-baqshalardy saqtaý máselesine qatysty mamandar bas josparda qalanyń jasyl qoryn saqtaý men ulǵaıtý qarastyrylǵanyn, taý bókterlerin damytýǵa qatań shekteýler engizilgen túsindirdi. Qoǵam belsendileriniń barlyq usynysy da esepke alynyp, egjeı-tegjeıli josparlaý jobasy ázirleýshilerge beriledi.

Úsh kúndik qoǵamdyq talqylaý barysynda sarapshylar men azamattardan túsken barlyq usynystar men eskertýler Almaty polıortalyqtarynyń bas josparlaryn ázirleý boıynsha tehnıkalyq tapsyrmalardy (TT) belgileý kezinde eskeriletin bolady.

Aıta keteıik, 25 qańtarda Almaty qalasynyń ákimdigi men «Almatybasjospar» ǴZI» JSHS Almaty qalasynyń 2040 jylǵa deıingi jańa Bas josparyn qoǵamdyq talqylaýdy bastady. Qazirgi bas jospar osydan 20 jyldan astam ýaqyt buryn – 2002 jyly bekitilgen, jáne onda qalanyń ósip kele jatqan qajettilikteri eskerilmegen. Bas josparǵa engizilgen túzetýler ony jan-jaqty jetildire almady: qujat ózgerister eskermedi, ózektiligin joǵaltty jáne túbegeıli qaıta qaraýdy qajet etti. Sondyqtan byltyr Almaty qalasynyń ákimi Erbolat Dosaevtyń tapsyrmasy boıynsha osy jyldyń birinshi toqsanynda qabyldanady dep josparlanǵan 2040 jylǵa deıingi qalanyń jańa bas jospary boıynsha jumys bastaldy.

Almaty qalasy ákiminiń baspasóz qyzmeti