Bilim salasy boıynsha sarapshy, elordadaǵy Qaıym Muhamedhanov atyndaǵy 90-gımnazıanyń dırektory Aıatjan Ahmetjan majorıtarlyq tártipke saı, qalalyq máslıhat saılaýyna kandıdat ataný úshin qujat tapsyrǵanyn málim etti. Bul týraly ol facebook paraqshasynda jazdy.
Sarapshy máslıhatqa baryp, Astana deńgeıinde bilim salasyna, ulttyq máselelerge, áleýmettik máselelerge barynsha áser etýge nıetti. Sondaı-aq ol májilis saılaýyna emes, máslıhatqa túsýge bel baılaýynyn sebebin túsindirdi:
"Kúlbiltelemeı ashyǵyn aıtaıyq. Saılaý jarıalanǵaly beri qaljyń-shyny aralas ár nárseni aıtyp kelemiz. Áleýmettik jeliniń emosıasyna sensek, úmit artatyndar kóp. Biraq áleýmettik jelidegi ár óńirde turatyn qaýymnyń bári mojarıtaldy jolmen dodaǵa túsetin kandıdattyń saılaýshysy emes. Ár kandıdattyń saılaýshysy - ózi túsetin óńirdiń halqy. Sondyqtan áleýmettik jelidegi laıyq pen pikirge emes, shynaıy jaǵdaıǵa taldaý jasaǵan durys.
“Saılaýǵa tússeńshi, parlamentke barsańshy”, - dep jelide de, ómirde de aıtyp jatqandar kóp. Árıne, senim artqasyn aıtady. Senimdi aqtaý - aýyr júk. Sondyqtan naqty sheshimimdi aıtaıyn.
Kóp oılana kele Astana qalasy máslıhat depýtattyǵyna kandıdatýramdy usyndym, ótinishimdi juma kúni jazdym. Alda kandıdat retinde tirkelgende taǵy habarlaımyn.
Nege qalalyq máslıhat, nege parlament májilisi emes?
Sebebi, birinshiden, Astananyń atynan túsip jatqan parlamentke laıyqty kandıdattar kóp. Astanadan berilgen eki-aq oryn, oǵan men syılaıtyn Arman Shorayev, Sultan Khan Zhussip aǵalarymyz túsip jatqanda, olarmen talasqanym, olardyń daýysyn bólip, azaıtýǵa yqpal etkenim ábestik bolar.
Ekinshiden, ózim mektep dırektorlyǵyna úsh jyl ýaqytqa úlken maqsat qoıyp kelgenmin. Qazirge eki jyl boldy, endi bir jyl ýaqytym bar. Sondyqtan orta joldan tastap ketý ata-ana jáne qoǵam aldyndaǵy jaýapsyzdyq bolar. Ulttyq mektep jobasyn tolyq aıaqtap, biraz tirlik istep ketýim kerek. Al máslıhat depýtattary óziniń negizgi jumysynan ketpeıdi.
Úshinshiden, saıası tájirıbemiz keremet emes, bizge áli bul jaqta ósý, tájirıbe jınaý kerek. Al máslıhat saılaýyna túsý, múmkindik bop jatsa máslıhat depýtaty bolý - sol tájirıbe jınaýǵa múmkindik.
Tórtinshiden, árıne, ol saılaýdaǵy ádildik, múmkindik. Ony oılamaı, baǵamdamaı men depýtat bolamyn dep aıqaılaı berý aqymaqtyq bolar. Parlamentke ótetinime senbeımin. Endi máslıhatqa múmkindik bar dep oılaımyn.
Sondyqtan bar múmkindikterdi paıdalana otyryp, Astana deńgeıinde bilim salasyna, ulttyq máselelerge, áleýmettik máselelerge barynsha áser ete alatyndaı máslıhatqa barýǵa sheshim qabyldadym.
Qalǵan áńgimeni resmı tirkelip, kandıdat atanǵan soń úgit-nasıhat kezeńi bastalǵanda aıtarmyz. Áıtpese qazirge artyq áńgime aıtyp qoıyp zańsyzdyqqa urynbaıyq".
