Rınat Zaıytov Instagram paraqshasynda "Amanat" partıasy májiliske usynyp otyrǵan tizimnen tabylýyna baılanysty pikir bildirdi.

"Ómir joly shynymen buralań-aý. Dál men "Amanat" partıasynyń quramynda bolady dep sizderdiń múldem oılamaǵandaryńyz aıtpasa da túsinikti. "Bul qalaı bolyp ketti?"- degen suraqtaryńyzǵa birinshi ózim jaýap bereıin.

Osy saılaýǵa deıin túrli jerde eldiń sózi sóıletetin bolsa, kez-kelgen múmkindikten bas tartpaıtynymdy aıtyp júrgenimdi ańǵarǵan shyǵarsyzdar? Sol múmkindiktiń úlkeni osy "Amanat". Kóńilimdegi kúnnen kúnge sóne bastaǵan úmit qaıta tutandy. Sebebi osy ýaqytqa deıin óz basym aty men zatynan aýlaq júrgen partıa áýeli atyn ózgertkende kúmánmen qabyldap edim. Búgin sol "Amanat" partıasy Qazaqstan memleketine ońdy ózgeris jasaǵysy keletinin kózime kórsetti, – dep jazdy aıtysker.

Ol partıa quramynyń ózgerýi oıyn ózgertkenin atap ótti.

"Quramyn 75% jańartqan partıada: Erlan Saıyrov, Amanjol Áltaı sekildi aǵalarymdy Asqat Aımaǵambetov, Maqsat Tolyqbaı, Nartaı Aralbaıdaı zamandas-baýyrlarymdy kórdim. Bul degenimiz, Erlan Jaqanuly Qoshanovtyń jańasha iske kirisýge jáne jańa saıası mádenıet qalyptastyrýǵa daıyn ekenin bildiredi. Ózime de sol ózgeriske qatysýdyń sátin týdyrdy. Nege tartynýym kerek? Iá, men óz otanymnyń ádiletti, turaqty, bir tildi, bir múddeli shynymen zaıyrly memleket bolǵanyn armandaımyn. Sol úshin de maǵan bul – óz oılarymdy tıisti jerge jetkizýge aparatyn tóte jol. Endeshe odan qur qyrsyqtyqpen bas tartý aqyldynyń isi emes. Eń bastysy, májilis minberinen oıymdy jetkizý. Endigi mindet partıanyń ǵana emes, memlekettiń de keleshek jumystaryna bilgenimniń sheńberinde úles qosý. Basqasynyń bári jaı sóz! Biz Amanatqa ózgerý úshin emes, ózgertý úshin keldik, –delingen jazbada.