Túrkıanyń Gazıantep qalasyndaǵy obektilerdiń birinde Qazaqstannan barǵan qutqarýshylar úıindilerdiń astynan 3 adamdy tirideı shyǵaryp aldy. Bul týraly tótenshe jaǵdaılar mınıstrliginiń baspasóz qyzmeti habarlady.

Qutqarýshylar qıraǵan konstrýksıalardyń astyna túsip, adamdardy joǵarydaǵy túrik áriptesterine jetkizip bergen.

"Qulaǵan toǵyz qabatty úıdiń qırandylarynyń astynan bir qart adam men eki jas jigit shyǵaryp alyndy. Qazaqstandyq qutqarýshylar olarǵa birinshi bolyp baryp, adamdardy Túrkıalyq áriptesterine jáne medısınalyq qyzmetterge tapsyrdy. Jumystar úzilissiz eki táýlik boıy konstrýksıalardyń qulaý qaýpi tónip turǵanymen asa kúrdeli jaǵdaılarda júrgizildi. Adamdardy anyqtaý úshin kınologıalyq eseptoptar jáne arnaıy izdeý quraldary belsendi túrde tartyldy" delingen mınıstrlik habarlamasynda.

Túrkıa men Sırıa shekarasy mańynda bolǵan joıqyn jer silkinisi saldaryn joıý jumystary jalǵasyp jatyr. Sońǵy málimetterge saı, Túrkıada zilzaladan qaza bolǵandar sany 12 myńnan asqan. Úıindilerdi arshý, tiri qalǵan adamdardy qutqarý jumystary táýlik boıy júrip jatyr.

Jer silkinisinen keıin Túrkıada 4 qazaqstandyqtyń joǵalyp, onyń bireýi aman-esen tabylǵan. Úıindi astynda qalǵan Sabıra Mamadıarova azdaǵan jaraqattar alǵan.