Pavlodar qalalyq ákimshilik quqyqbuzýshylyq jónindegi mamandandyrylǵan sot oblystyq polısıa departamentiniń burynǵy basshysy Nurlan Másimovtyń eki isin qarady. Sot búdjettiń isin tıimsiz paıdalanǵany úshin ár is boıynsha 214,4 myń teńge aıyppul taǵaıyndady. 

Sot departamenttiń 2021 jyly 18 qyzmettik jylqyǵa jem satyp alýǵa 60,9 mln teńge bólgenin anyqtaǵan. Alaıda normalardy buzyp, 10,7 mln teńge artyq josparlaǵan. 2022 jyly jemge 13,4 mln teńge bólingen, biraq normadan tys 8,5 mln teńge qosylǵan.

Sot tıimsiz josparlaý búdjet aqshasyn tıimsiz paıdalanýǵa ákep soqty dep esepteıdi.

"Oblystyq polısıa departamenti burynǵy basshysynyń kinási ákimshilik quqyqbuzýshylyq týraly hattamalar arqyly, aýdıtorlyq esepter, tekserý komısıasynyń materıaldary, aıǵaqtar jáne sot zerttegen basqa da materıaldar arqyly dáleldenedi. Sot QR ÁQBtK 234-1-baby boıynsha aıyptalýshyǵa ár is boıynsha 214,4 myń teńge kóleminde aıyppul taǵaıyndady", - dep habarlady sottyń baspasóz qyzmeti.

Sondaı-aq, sot ákimshilik quqyqbuzýshylyq týraly hattama jasaý kezinde is júrgizý normalaryn buzǵany úshin "Pavlodar oblysy boıynsha tekserý komısıasy" MM atyna jeke qaýly shyǵardy.

Nurlan Másimovtiń ózi qazir ózge qylmystyq ister boıynsha tergeýde otyr. Ol 2022 jyly 17 qańtarda qyzmetinen bosatylyp, artynsha izdeý jarıalanǵan. Oǵan asa aýyr sybaılas jemqorlyq qylmys jasady degen aıyp taǵyldy. 2022 jyly 13 shildede Ultyq qaýipsizdik komıtetiniń ókilderi Nurlan Másimovti Reseı shekarasynyń mańynda ustaǵan.