2 aqpanda qar erip, jaýyn-shashyn mol túsýine baılanysty Túrkistan oblysynyń bes aýdanynda 20 eldimekendi sý basyp, 234 úıdiń aýlasyna sý kirdi. Jaǵdaı turaqtalǵanymen, kópshilikti oblys aýmaǵyndaǵy Shardara sý qoımasynyń tolýy alańdatty. Alaıda búginde sý qoımadaǵy sý deńgeıi sekýndyna 1500-1600 kýb metrden 1066 kýb metrge tómendegen. Bul týraly Qamshy portalyna Túrkistan oblysy ákiminiń birinshi orynbasary Arman Jetpisbaı málim etti.

"Túrkistan oblysynda Shardara sý qoımasynyń tolýy úlken másele boldy. Osyǵan oraı, 2023 jylǵy 9 qańtarda oblys ákimimen Shardara sý qoımasyndaǵy kórshi memleketten keletin sý kólemin azaıtýǵa yqpal etý týraly Qazaqstan Respýblıkasy Premer-Mınıstriniń atyna hat joldanǵan. Sonymen qatar, Shardara sý qoımasy men Syrdarıa ózenindegi sý tasqynynyń aldyn alý máseleleri QR Premer-Mınıstriniń orynbasary R.V.Sklárdyń tóraǵalyǵymen 2023 jylǵy 31 qańtarda ótken májiliste qaralyp, tıisti tapsyrmalar berildi. Búgingi tańǵa Shardara sý qoımasyna keletin sý mólsheri sekýndyna 1500-1600 kýb metrden 1066 kýb metrge tómendedi" dedi Arman Jetpisbaı Qamshy portalyna bergen resmı jaýapta.

Oblys ákimi birinshi orynbasarynyń sózinshe, eldimekenderdi sý tasqynynan saqtaý úshin aımaqta 2022-2023 jylǵy kúz-kóktemgi sý tasqyny kezeńinde tasqyn sýlardy qaýipsiz ótkizýdi qamtamasyz etý is-sharalar jospary bekitilip, aýdan qala ákimderine, tıisti departament, basqarma jáne mekeme basshylaryna oryndaý úshin joldanǵan.

"Osy jospardy oryndaý barysynda sý tasqynynyń aldyn alýǵa jalpy 462 mln.teńge bólinip tasqynǵa qarsy ınjenerlik jumystar atqaryldy. Atap aıtqanda: 1218 shaqyrymdy quraıtyn 680 aryqtar men kanaldar qoqystan tazartylyp, 952 shaqyrym qashyrtqy arnalar mehanıkalyq tazartýdan ótkizildi, tasqynǵa qarsy 34 myń 900 dana qap, 1000 tonnaǵa jýyq ınertti materıaldar ázirlendi. Sondaı-aq, tótenshe jaǵdaıǵa den qoıýǵa jergilikti atqarýshy organdar men tótenshe jaǵdaılar departamenti tarapynan jalpy 2065 jeke quram, 424 birlik tehnıka, 5 qaıyq, 116 motopompa daıyndyqqa keltirildi" delingen resmı jaýapta.

Arman Jetpisbaıdyń aıtýynsha, oblys sý basý zardaptaryn joıý, sý basqan eldimekenderdiń halqyn evokýasıalaý syndy sharýalarǵa ázir, azamattyq qorǵaý kúshteri men quralymdary, tıisti tehnıkalar daıyn..