İshki ister mınıstrligi el aýmaǵyna qosalqy bólshekter túrinde ákelinip, qurastyrylyp, Qazaqstan azamattaryna satylǵan kólikterdi de zańdastyrý tetikteri ázirlenip jatqanyn málim etti.

"İİM avtokólikterdi zańdastyrý prosesinde týyndaıtyn problemalyq máselelerdi sheshý úshin taldaý júrgizýde. Atap aıtqanda, zańdastyrý prosesinde kóbine basqarý organdary oń jaqta ornalasqan avtokólikter anyqtaldy, olar el aýmaǵyna qosalqy bólshekter túrinde ákelinip, keıinnen Qazaqstan azamattaryna satylǵan. Atalǵan kólikter boıynsha İshki ister mınıstrligi memlekettik organdarmen birlesip, olardy Qazaqstan Respýblıkasynda bastapqy tirkeýdiń quqyqtyq tetikterin ázirledi. Qazir zańmen resimdeý jumystary júrgizilýde" delingen habarlamada.

Mınıstrlik málimetinshe, shetelden ákelingen kólikterdi zańdastyrý bastalǵan alǵashqy 20 kúninde 27 myńǵa jýyq kólik quraly tirkeýden ótken.  Taǵy 65 myńnan astam avtokólik aldyn ala tekserýden ótip, nómirlik agregattardy salystyrýǵa jáne odan ári tirkeýge jiberilgen.

Buǵan deıin ishki ister mınıstrligi konstrýktor-kólikterdi zańdastyrý týraly múlde sóz qozǵalýy múmkin emestigin, olar jol qozǵalysyna qaýip tóndiretinin habarlaǵan. İİM orynbasary Igor Lepóha tipti jınalǵan kólikterdi bólshektep satyp jiberýge keńes bergen. Endi mine, mınıstrlik óz ustanymyna kereǵar sheshim qabyldaǵanyn jarıalap otyr.

Qazirgi tańda shetelde esepten resmı shyǵarylmaǵan kólikter zańdastyrý prosedýrasynan tys qalyp otyr. Olar kóligin ákelgen elge baryp, burynǵy ıesin taýyp, esepten shyǵarý tym qymbat ekenin, úkimet bir jolǵa olardyń da kóligin zańdastyryp berýdi surap júr.