«Dara» qaıyrymdylyq qory Perkıns (AQSH) mektebimen úsh jyldyq kelisim-shartqa otyrdy. Taraptar kórý qabileti buzylǵan balalardyń sapaly bilim alýyna qoljetimdilikti jaqsartý maqsatynda yntymaqtastyq ornatý týraly ýaǵdalasty. Bul týraly qordyń qoǵammen baılanys bólimi habarlady.

Jobanyń alǵashqy benefısıary – Almatydaǵy Ostrovskıı atyndaǵy №4 mektep. Bul zaǵıp jáne nashar kóretin balalardy oqytatyn Qazaqstandaǵy eń kóne mektep sanalady.

Almaty qalasynyń bilim basqarmasy, Dara qory jáne №4 arnaıy mektep-ınternaty kórý qabileti buzylǵan jáne kóptegen damý kemistigi bar balalarǵa arnalǵan bilim berý júıesin jetildirý baǵdarlamasyn iske asyrý boıynsha memorandýmǵa qol qoıdy.

Jobany iske asyrýdyń birinshi kezeńi osy jyldyń 6 aqpanynda bastaldy. Eýropa jáne Eýrazıa boıynsha Perkıns mektebiniń dırektory Darıa Ýdovıvıch jáne Perkıns mektebiniń jattyqtyrýshysy jáne keńesshisi Soná Alımovıch Almatydaǵy Ostrovskıı mektebine bardy. Halyqaralyq mamandar oqytý baǵdarlamasymen tanysyp, balalardyń ınternatta ómir súrý jaǵdaılaryn kórip, toptarda jumys isteıtin muǵalimdermen kezdesti.

Perkıns mektebi – bilim berý salasyndaǵy álemdik kóshbasshy. Ol 1829 jyly ashylǵan AQSH-taǵy eń kóne bilim berý mekemesi. Kórý qabileti buzylǵan, sondaı-aq 3 jastan 21 jasqa deıingi kóptegen damý aqaýlary bar balalarǵa jan-jaqty bilim beredi. Sonyń ishinde qulaqtary estimeıtin jáne kózderi kórmeıtin balalar bar. Mektep álemniń 97 elinde jumys isteıdi.

Búgingi tańda Qazaqstanda kórý qabileti buzylǵan balalarǵa arnalǵan 11 mektep ashylyp, onda 1450-ge jýyq bala bilim alýda. Almatyda kórý qabileti nashar balalardyń sany shamamen 456. Olardyń jartysynan astamy zaǵıp jáne nashar kóretin balalarǵa arnalǵan №4 arnaıy mektep-ınternatynda oqıdy. Sonymen qatar, úıde oqıtyn balalar mektepke bekitiledi.

Jobanyń ekinshi kezeńin júzege asyrý aıasynda Ostrovskıı atyndaǵy №4 mekteptiń muǵalimderi elimiz boıynsha osyndaı mektepterde jumys isteıtin áriptesterimen ózderiniń tájirıbelerimen bólisedi.  

Anyqtama:

«Dara» Qorynyń mısıasy - jetim balalar men erekshe bilim berýdi qajet etetin balalardyń ómir súrý jaǵdaıyn jaqsartý, qoǵamǵa beıimdeý jáne erekshe qajettilikteri bar balalardyń damý múmkindikterin keńeıtýge baǵyttalǵan jobalardy júzege asyrý bolyp tabylady.

Sonymen qatar, Qor múgedekter men jetim balalardyń quqyqtaryn júzege asyrý bóliginde zańnama men tájirıbeni jetildirý boıynsha usynystardy ázirleýge qatysady, basqa qoǵamdyq uıymdarmen reformalardy ilgeriletýde yntymaqtasyp jumys isteıdi.