Qorǵanys mınıstrligi vedomstvonyń oqý oryndaryna túsý erejeleri týraly habarlady.
Otandyq áskerı bilim berý júıesine magıstratýra jáne doktorantýra baǵdarlamalary boıynsha joǵary oqý ornynan keıingi daıarlaý júzege asyrylatyn Ulttyq qorǵanys ýnıversıteti, úsh áskerı joǵary oqý orny, eki kolej jáne Almaty, Shymkent jáne Qaraǵandydaǵy "Jas ulan" respýblıkalyq úsh mektebi kiredi.
Almaty qalasyndaǵy Qurlyq áskerleriniń áskerı ınstıtýty basshylyq mamandyqtary boıynsha kadrlar daıarlasa, Ushý jáne ınjenerlik-tehnıkalyq quramnyń mamandaryn Aqtóbe qalasyndaǵy Áýe qorǵanysy kúshteriniń áskerı ınstıtýty daıyndaıdy. Almaty qalasyndaǵy Radıoelektronıka jáne baılanys áskerı-ınjenerlik ınstıtýtynda radıotehnıkalyq mamandyqtardyń ofıser-ınjenerleri oqytylady.
Mınıstrlikke qarasty Áskerı bilim jáne ǵylym departamentiniń bastyǵy general-maıor Jumabek Ahmetov áskerı ınstıtýttarǵa túsý úshin 30 sáýirge deıingi merzimde jergilikti áskerı basqarý organy basshysynyń atyna ótinish ótkizý kerektigin aıtty. Al qujattar 15-20 shilde aralyǵynda qabyldanady.
Bıyldan bastap merzimdi áskerı qyzmet atqarǵan jáne qolbasshylyqtyń usynysyn alǵan azamattarǵa jeńildikter qarastyrylmaq.
Barlyq oqý kezeńinde kýrsanttar tolyq memleket tarapynan qamtylatyn bolady. Áleýmettik paketke aqshalaı qarajat, kıim-keshek, kúnine úsh ret tamaqtaný, tegin medısınalyq kómek jáne jataqhanada turý kiredi.
Pikir qaldyrý