Túrkıada jer silkinisinen zardap shekkenderge kómek retinde «Salıqaly urpaq» qoǵamdyq qorynyń atynan 500 000 dollar aýdardy. Bul týraly Túrkıanyń Qazaqstandaǵy tótenshe jáne ókiletti elshisi Ýfýk Ekıdjı men qor basshysynyń ózara kezdesýinen keıin belgili boldy. Taraptar jer silkinisinen keıingi jaǵdaıda «Salıqaly urpaq» qory basqa da qandaı kómek kórsete alatyny jóninde keńesti.

«Qıyn kezeńge tap bolǵan baýyrlas Túrkıa halqyna «Salıqaly urpaq» qoǵamdyq qory qarjylaı kómek kórsetý týraly sheshim qabyldady. Biz jer silkinisinen zardap shekkenderge 500 000 dollar aýdardyq. Qarajat alǵashqy kerek-jaraq zattar men dári-dármek satyp alýǵa jáne ózge de qajettilikter úshin jiberildi. Baýyrlarymyz ben ápke-qaryndastarymyz bastaryna túsken qıynshylyqty kóp uzamaı eńsersin dep tileımiz!» dedi qor dırektory Qasym Qasabekov.

«Salıqaly urpaq» qoǵamdyq qory 2016 jyly qaıyrymdylyq baǵytta qurylǵan. Onyń maqsaty halyqtyń osal toptaryna bilim berý jáne densaýlyq saqtaý salalarynda kómektesýge negizdelgen. Osy ýaqytqa deıin qor qaıyrymdylyq is-sharalar men aksıalarǵa 1 mıllıard teńgege jýyq qarjy aýdarǵan. Atap aıtsaq:

• Almaty jáne Almaty oblysyndaǵy muqtaj otbasylarǵa 1000 noýtbýk taratyldy;
• Qazaqstan musylmandary dinı basqarmasymen birlese otyryp, el boıynsha 3 meshit salyndy;
• Koronavırýs ınfeksıasymen kúreske 150 mıllıon teńge bólindi;
• Maqtaaral aýdanynda bolǵan sý tasqynynan zardap shekkenderge 20 úı turǵyzyldy;
• Almaty jáne Almaty oblysyndaǵy muqtaj otbasylarǵa 5 úı men 5 páter berildi;
• «Qazaqstan halqyna» áleýmettik qoryna 1 mıllıard teńge aýdaryldy;
• Almaty jáne Almaty oblysyndaǵy kómekke muqtaj jáne kópbalaly otbasylardaǵy 2 000 oqýshyǵa kanselárıalyq zattarǵa toly rúkzaktar taratyldy;

2016 jyldan beri qor bastamasymen jetimderge arnalǵan «Bereke úıi» ashyldy. Búginge deıin 70-ten astam bala tárbıelendi. «Salıqaly urpaq» 5 jyldan beri balalarǵa arnalǵan lagerlerde qaıyrymdylyq sporttyq-saýyqtyrý is-sharalaryn ótkizip keledi. Sonymen qatar,  jyl saıyn Almaty jáne Almaty oblysy ákimdikterimen birlesip, túrli mádenı-saýyqtyrý baǵytyndaǵy bastamalardy uıymdastyrady.

Aıta keteıik, Qazaqstan Prezıdenti Qasym-Jomart Toqaev Úkimetke Túrkıa elindegi apatty jer silkinisinen zardap shekkenderge jedel kómek kórsetý úshin 1 mıllıon dollar qarjy bólýdi tapsyrǵan edi. Jalpy, qazirgi ýaqytqa deıin qazaqstandyqtar Túrkıa turǵyndaryna kómek retinde 2 mıllıon 849 myń 836 dollar jınady. Barlyq qarajat AFAD resmı shotyna aýdaryldy.