Almaty qalasynyń Bostandyq aýdandyq soty "Pioneer Capital Invest" JSHS men Jusan Technologies Ltd arasyndaǵy "First Heartland Jusan Bank" AQ-nyń, sondaı-aq onymen baılanysty uıymdardyń ("Jusan" toby) aktıvterin sheteldik ıýrısdıksıaǵa berý týraly mámileni jaramsyz dep taný týraly Almaty qalasy prokýrorynyń talap-aryzy boıynsha azamattyq is qozǵady, dep habarlaıdy bas prokýratýranyń baspasóz qyzmeti.
Byltyr maýsymda prezıdent Qasym-Jomart Toqaevtyń tapsyrmasymen elden zańsyz shyǵarylǵan qarajatty Qazaqstanǵa qaıtarý jónindegi vedomstvoaralyq komısıa qurylǵan sátten bastap bas prokýratýra kapıtaldy jymqyrý jáne shet elge shyǵarý faktilerin anyqtaý úshin bank sektorynda taldaý júrgizdi.
Taldaý barysynda "Jusan" tobynyń aktıvterin basqarý qurylymyn ózgertýdiń kóleńkeli sqemasy anyqtalǵan. Bul sqemany júzege asyrý nátıjesinde toptyń qyzmetin baqylaý quzireti shetelde tirkelgen uıymdarǵa óteýsiz berilgen.
Atap aıtqanda, 2020 jylǵy 27 sáýirde Jusan tobynyń ıesi "Pioneer Capital Invest" JSHS qatysýshylarynyń jalpy jınalysynda Pioneer múlkin shetelde tirkelgen Jusan Technologies Ltd kompanıasynyń jarǵylyq kapıtalyna berýdi maquldaý týraly sheshim qabyldanǵan.
"Bul áreketter qoǵamdyq múddege, onyń ishinde "Nazarbaev ýnıversıteti" men "Nazarbaev zıatkerlik mektepteriniń" ondaǵan myń qazaqstandyq stýdenti men oqýshylarynyń múddesine qaýip tóndirdi. Sebebi "Jusan" tobynyń aksıalary, oblıgasıalary men depozıtteri boıynsha dıvıdendteri – atalmysh oqý oryndaryn qarjylandyrý kózderiniń biri", - deıdi bas prokýratýra.
Budan bólek, 2023 jylǵy 3 aqpanda bas prokýratýraǵa "Nazarbaev qorynan" aryz tústi. Qor birqatar sýbektiniń quqyqqa qarsy áreketteriniń saldarynan "Jusan" toby sheteldik azamattardyń baqylaýyna ótip ketkenine shaǵymdanyp, prokýrorlyq qadaǵalaý sharalaryn qabyldaýdy suraǵan.
"Osylaısha prokýratýra organdarynyń maqsaty – tek ádilettilikti qalpyna keltirip, "Jusan" tobynyń aktıvterin basqarýdy Qazaqstannyń quzyryna qaıtarý", - dep naqtylady bas prokýratýranyń baspasóz qyzmeti.
Atalǵan talap-aryz Jusan Banktiń jumysyna qatysty emes, ıaǵnı onyń aǵymdaǵy qyzmetine, sondaı-aq bank klıentteri men iskerlik seriktestikterimen ózara is-qımylyna shekteý qoımaıdy.
İstiń sotta qaralýy Jusan Banktiń jumysyna áser etpeıdi, ol qalypty jaǵdaıda jumysyn jalǵastyrady, dep sendirdi bas prokýratýra.
