Sybaılas jemqorlyqqa qarsy qyzmet agenttiginiń ókilderi Túrkistan oblysy Jetisaı aýdanynyń ákimshiligin tekserip, aýyldyq okrýgterdiń ákimderin qylmystyq jaýapkershilikke tartýmen qorqytyp, olardan aqshalaı qarajat talap etken. 

Bas prokýratýra málimetinshe, Antıkor qyzmetkerleriniń turaqty túrdegi talaptarynan keıin ákimshilik jumyskerleri tekserýshilerge tekseristiń oń sheshilýi úshin 400-myńnan 630-myń teńgege deıingi qarajat bergen.

Nátıjesinde 7 aýyldyq okrýgtiń ákimi men ákimshiliktiń 1 esepshisi sottarmen ártúrli merzimge bas bostandyqtarynan aıyrý jáne aıyppul túrindegi jazalarǵa tartylǵan.

"Bas Prokýrordyń narazylyǵymen Joǵarǵy Sot olardy tolyǵymen aqtap, Sybaılas jemqorlyqqa qarsy qyzmet ókilderiniń is-áreketterinde tikeleı arandatýshylyq bar ekenin anyqtaǵan. Óz kezeginde, 2 jedel ókilge qatysty Qylmystyq kodektiń 362-baby 4-bóligimen (bılikti jáne laýazymdyq ókilettikterdi asyra paıdalaný) sotqa deıingi tergep-tekserý bastaldy. Tergep-tekserýdi Bas prokýratýranyń arnaıy prokýrory júrgizip, kinálerin tolyǵymen dáleldep, qylmystyq is sotqa joldandy”, – delingen vedomstvo habarlamasynda.

Túrkistan oblysy Jetisaı aýdandyq sotynyń 2023 jylǵy 26 qańtaryndaǵy úkimimen aýyr sanattaǵy laýazymdyq qylmysty jasaǵandary úshin Sybaılas jemqorlyqqa qarsy qyzmetiniń burynǵy 2 jedel ókili arnaıy shenderinen aıyrylyp, árqaısysy 6 jylǵa bas bostandyqtarynan aıyrý jazasyna tartylgen. Jábirlenýshilerdiń paıdasyna moraldyq zalal óndirilgen.