Táýelsizdik jyldarynan beri balalarǵa eń jıi qoıylǵan esimderdiń ındeksi tolyq jańaryp, attardyń mán-mazmuny dinı sıpatqa oıysqany baıqalady. Bul týraly Astana qalasynyń tilderdi damytý jáne arhıv isi basqarmasynyń basshysy Sáken Esirkep málim etti.
Sáken Esirkep balaǵa at qoıý halyqtyń rýhanı qundylyǵyn, nege jiti kóńil bóletinin aıqyndaıtyn barometr ekenin, muny antroponımıka ǵylymy da dáleldeıtinin aıtady.
"Toqsanynshy jyldary ul balalardyń top ondyǵynda Azamat, Nýrsýltan, Baýyrjan, Danıar, Erlan, Oljas, Rýslan, Arman, Erjan, Jandos attary ornalassa, sońǵy 2022 jyly Alıhan, Omar, Aldıar, Aısultan, Amır, Nurıslam, Alan, Alı, Alınur, Arsen degen attar kósh bastaǵan.
Qyzdarda 1991 jyly Aıgerım, Aıdana, Dınara, Aınýr, Janar, Aıjan, Asel, Madına, Saltanat, Araılym esimi jıi qoıylsa, byltyr Medına, Aılın, Aısha, Asylym, Tomırıs, Aıala, Raıana, Safıa, Aızere jáne Aıym atty búldirshinder dúnıege kóp kelgen eken.
Otyz jyl ishinde balalarǵa eń jıi qoıylǵan esimderdiń ındeksi tolyq jańarǵanyn kórdińizder. Sonymen birge attardyń mán-mazmuny da dinı sıpatqa oıysqany baıqalyp tur. Bul adamdardyń dinı kózqarasyna baılanysty ma, álde elikteýshilikten be? Ol jaǵy jeke zertteýdi qajet etedi.
Qyzdarǵa esim qoıýda á, q, i, ú, u, ó, ǵ sıaqty qazaqtyń tól dybysynan qashý úrdisi baıqalady. Bul Aınýra, Nýraı, Asel, Karagoz, Gýlsım degen sıaqty tól dybysymyzdy burmalaıtyn attardyń kóbeıgenine qaraǵanda jaqsy da shyǵar.
Zaman bir ornynda turmaıdy. Kózqaras, qundylyqtyń ýaqyt óte ózgerip otyrǵany da durys shyǵar. Dese de balaǵa at qoıýda utqanymyzdan utylǵanymyz kóp emes pe degen oı keledi eken" deıdi Sáken Esirkep.
Pikir qaldyrý