Elde bir jylda taksı aqysy 12,2% qymbattaǵan.

Energyprom.kz portalynyń málimetinshe, óńirler boıynsha eń kóp qymbatshylyq Atyraý oblysynda baıqalǵan. Bir jylda qyzmet baǵasy birden 37,5%-ǵa qymbattaǵan. Odan keıin Jetisý (33%) jáne Abaı oblystary (31,2%) tur.

Eń az jyldyq ósim Aqmola oblysynda tirkeldi: bar bolǵany 0,5%. Taǵy úsh oblysta – Qaraǵandy, Túrkistan jáne Ulytaýda baǵa bir jyl burynǵy deńgeıde qaldy.

Numbeo derekteginshe, standartty tarıfpen 1 km taksı qyzmeti Egıpette (0,16 AQSH dollary), Pákistanda (0,19 AQSH dollary) jáne Belarýste (0,2 AQSH dollary) arzan bolyp sanalady.

Arzan elder ondyǵyna TMD-dan Armenıa men Ózbekstan (árqaısysy 0,26 AQSH dollary), Ýkraına, Moldova jáne Reseı (árqaısysy 0,27 AQSH dollary) kiredi. Qazaqstan (0,44 AQSH dollary) men Ázerbaıjanda (0,59 AQSH dollary) taksı qyzmeti qymbatyraq.

Eń joǵary baǵa Shveısarıada (4,25 AQSH dollary), Kýveıtte (3,27 AQSH dollary) jáne Iamaıkada (3,26 AQSH dollary) tirkelgen. 

2022 jyldyń qańtar-jeltoqsan aılarynda Qazaqstanda taksı qyzmetin usynatyn kompanıalardyń tabysy bir jylda 16% ósip, 5 mlrd teńgege jetken.

Eń joǵary kórsetkish Qaraǵandy oblysynda baıqalǵan. Bul saladaǵy kompanıalardyń tabysy bir jyl ishinde 49,5% ósip, 2,1 mlrd teńgege jetken. Úzdik úshtikke elorda (1,1 mlrd teńge, 0,2% kóbeıgen) men Almaty (1 mlrd teńge, 0,9% azaıǵan) kirgen.