Brazılıa jaǵalaýynda bolǵan jańbyr men sý tasqyny saldarynan 36 adam qaza tapty. San-Sebastánda 35 adam kóz jumsa, Ýbatýba meri jas qyzdyń denesi tabylǵanyn habarlady. Jeksenbi kúni aýdandarda jaýyn-shashynnyń aılyq mólsherinen 2 ese kóp deńgeıde jaýyn jaýǵan. Bul týraly VVS saıty habarlady.

Qutqarý-izdestirý jumystary áli de júrgizilýde. Keıbir qalalarda jyl saıyn ótetin karnaval toılaýǵa tyıym salynǵan.

«Qutqarýshylar sany az. Jaǵdaı qıyn. Shyǵyn kólemin áli eseptemedik. Qalada 50-ge jýyq úı qulap, ondaǵan adam is-tússiz joǵalyp ketti» dedi San-Sebastán qalasynyń meri Felıpe Aýgýsto.

Sheneýnikterdiń málimdeýinshe, San-Paýlýdyń soltústik jaǵalaýdaǵy aýdandardan 338 adam evakýsıalanyp, 228 adam baspanasyz qalǵan.

Prezıdent Lýıs Inasıý Lýla da Sılva Tvıtterdegi paraqshasynda jaqyndarynan aıyrylǵandarǵa kóńil aıta otyryp, dúısenbi kúni zardap shekken aýdandarǵa baratynyn jazdy.

«Biz úkimetti uıystyryp, jaralylardy emdeýge, is-tússiz joǵalǵandardy izdestirip, jol men  telekomýnıkasıany qalpyna keltirýge barymyzdy salamyz» dedi Sılva myrza.

Zertteýshiler sý tasqyny sekildi tabıǵı apattar klımat ózgerýiniń saldarynan jıilep ketkenin aıtady. Aımaqta qaıtadan qatty jańbyr jaýyp, qutqarýshylardyń jumysy qıyndaı túsýi múmkin.