Bas áskerı prokýratýra 2022 jyldyń tamyzynda "Shóldala" shekara zastavasynda sýısıd jasaǵan merzimdi áskerı qyzmetshisi Bekbol Mırashtyń ólimin tergeý barysy týraly málimet berdi. 

Vedomstvo dereginshe, bılikti asyra paıdalaný arqyly ózin-ózi óltirýge deıin jetkizý aıyby boıynsha kúdikti retinde sol zastavanyń kelisimshart boıynsha áskerı qyzmetshisi tergelip jatyr. Qylmystyq is materıaldaryna sáıkes" ol B.Mırashty jáne onymen birge áskerge shaqyrylǵan basqa da merzimdi áskerı qyzmetkerlerdi júıeli túrde psıhologıalyq turǵyda qorlap, soqqyǵa jyqqan.

"Kúdikti qamaýǵa alynyp, tergeý jalǵasýda jáne erekshe baqylaýǵa alynǵan. Tergeý barysynda bolǵan oqıǵanyń barlyq nusqalary, sonyń ishinde jynystyq zorlyq-zombylyq múmkindigi tekserildi. Alaıda, bul derek rastalmaǵan. Advokattyń ótinishhattary belgilengen merzimde qaraldy jáne qylmystyq is júrgizý zańnamasy tártibimen qanaǵattandyryldy" delingen Bas áskerı prokýratýra habarlamasynda.

Kúdikti serjant Aıbek Nurtaevtyń advokaty Serjan Pirálıev taıaýda jýrnalıserge osy iske qatysty adam sengisiz faktilerdi jarıa etken. Onyń sózinshe, sarbazdyń kıimi men aýzynan birneshe adamnyń sháýeti anyqtalǵan. Osy aqparatty jarıalaǵany úshin İİM Pirálıevti "advokattyq etıkany buzdy" dep aıyptap, isti Ádilet mınıstrligine joldaǵan.

Alaıda Astana qalasynyń advokattar alqasy Serjan Pirálıev eshqandaı etıkalyq normalardy buzbaǵanyn anyqtady.

Jýyrda QR UQK tóraǵasynyń orynbasary – Shekara qyzmetiniń dırektory, general-maıor Erlan Aldajumanov Bekbol Mırashtyń óliminen keıin qyzmettik tergeý júrgizilip, departament pen zastava bastyǵy qyzmetinen shettetilgenin aıtty.

Derekkóz: ulysmedia.kz